गोरखा समाचारदाता
गोरखा – नेपाली काँग्रेस गोरखाले वर्तमान सरकारको बिरोधमा पर्दशन गरेको छ । भाद्र २४ गतेबाट सुरु भएको हिमाल पहाड तराई मधेश दोश्रो जागरण अभियानको समापनको अबसरमा नेपाली काँग्रेस गोरखाले पार्टी कार्यालय तिनधारे देखि हरमटारी चोकसम्म विरोध जुलुस निकालेको हो ।
मूल्यवृद्धि कम गर, हत्याहिंसा र बलत्कार बन्द गर, भष्टूाचार बन्द गर जस्ता नारा लगाउँदै काँग्रेसका नेताकार्यकताले बजार परिक्रमा गरेका थिए । हरमटारीमा भएको कोणसभालाई संबोधनगर्दै काँग्रेस नेतृ कमला पन्तले सरकार संबिधानको बिरोधमा चलेको दाबी गरेका छन् ।
‘सरकार जनताको साथी हुनुपर्छ, अहिले सरकारले जनतालाई महँगी बढाउने, कर थुपार्ने गरेर सास्ती दिएको छ’ उनले भनिन ‘कमिसनको खेलमा आफ्ना कार्यकता पोस्ने काम मात्र भएको छ ।’ पन्थडिही कटहरे सडक, घैरुङ बतासे सडक, बुढीगण्डकी आयोजना जस्ता बिकास निर्माण काममा केन्द्र सरकारकै निर्देशनमा अलपत्र पारिएको उनले दाबी गरेकी छिन् । सरकारले भ्रष्ट्राचारमा डुबेको पन्तको आरोप छ ।
अर्का केन्द्रिय सदस्य चिनकाजी श्रेष्ठले मिडिया काउन्सिल विधेयक, गुठी विधेयक जनताको हितविपरित रहेको बताउँदै उनले सरकारले बहुमतको आडमा निरङ्कुशता लादेको आरोप लगाए । ‘सरकारले जनताको अधिकार कुन्ठित गरेको छ प्रधान मन्त्री ओली निरङ्कुश देखिएका छन’ केन्द्रीय सदस्य चिनकाजी श्रेष्ठले भने ‘अहिले जस्तै प्रवृत्तीले जनताको हक अधिकार सरकारले कुन्ठित गर्दै गयो भने सरकार रहँदैन ।’
जिल्ला सभापति हरिबहादुर घलेले सरकारले गरेका नराम्रा काम प्रति जनता र कांग्रेसले सचेत गराउन विरोध सभा गरेको बताए ।
सभामा जिल्लाका अगुवा नेता कर्याकर्ता सहभागी थिए । सभा अघि कांग्रेस पार्टी कार्यालय तीनधारेबाट सरकारको विरोध गर्दै नेताकार्यकर्ताले नराबाजी गरेका थिए । बसपार्क, शक्तिचोक हुँदै हरमटारीमा पुगेर रयाली सभामा परिणत भएको थियो ।
एनसेलको कर छली प्रक्ररण, विभिन्न विधेयकहरु, निर्मला पन्तको हत्या, ठूला योजना प्रतिको हेलचेक्राईका बारेमा नेताकार्यकर्ताले नाराबाजी गर्दै खबरदारी गरेका थिए । यस अघि कांग्रेसले गोरखाको चारवटै प्रदेश निर्वाचन क्षेत्रमा जागरण अभियान सोमवार सकेको जिल्ला सचिव नन्दप्रसाद न्यौपानेले बताए ।
