गोरखा समाचारदाता
गोरखा – जलाशययुक्त बुढीगण्डकी जलविद्युत आयोजना निर्माणमा भएको ढिलाईप्रति जिल्लाका राजनितिक दलले चासो ब्यक्त गरेका छन् । लामो समयदेखि अन्योलको अवस्थामा रहेको आयोजना निर्माणको प्रकृया अघि बढाउन नेपाल कम्युनिष्ट पार्टी (नेकपा), नेपाली काँग्रेस र समाजवादी पार्टीले माग गरेका छन् ।
गत शनिबार आयोजनाको अवस्था र चुनौतीका बारे भएको साझा सभामा प्रभावित क्षेत्रका बासिन्दाले आयोजनाको काममा प्रगती नभएको भन्दै चर्को असन्तुष्टी ब्यक्त गरेका थिए ।
सो बिषयलाई लिएर नेपाल कम्युनिष्ट पार्टी (नेकपा)ले आइतबार सचिवालय बैठक बसेर आयोजनाको काम अघि बढाउन सरकार समक्ष माग गरेको छ भने नेपाली काँग्रेस र समाजवादी पार्टीले सोमबार छुट्टाछुट्टै विज्ञप्ती निकालेर प्रभावितका माग सम्बोधन गर्दै प्रकृया अघि बढाउन दवाद दिएका हुन् ।
आयोजना प्रति सरकार उदासिन : काँग्रेस
नेपाली काँग्रेस गोरखाले बुढीगण्डकी आयोजना निर्माणमा सरकार उदासिन रहेको आरोप लगाएको छ । सोमबार जिल्ला सचिव नन्दप्रसाद न्यौपानेले हस्ताक्षर गरेको विज्ञप्तीमा सरकारकै कारण निर्माण प्रकृया अघि नबढेको बताइएको छ ।
लामो समयदेखि जग्गा रोक्का गरेर आरुघाट, आरखेत लगायतका क्षेत्रको मुआब्जा निर्धारण नगरिदिदा सरकारले त्यसक्षेत्रका बासिन्दालाई अन्याय गरेको काँग्रेसको आरोप छ । ‘२०७३ जेठ १९ गतेबाट सम्पूर्ण घरजग्गा बेखबिचन र बैङ्किङ कारोबार सरकारद्धारा बन्देज गरिएको थियो’ विज्ञप्तीमा भनिएको छ ‘तर पनि हालसम्म मुआब्जा समेत नतोक्दा त्यस क्षेत्रका बासिन्दालाई सरकारले अन्याय गरेको छ ।’
त्यस्तै काँग्रेसले हाल भएको मुल्य बृद्विलाई आधारमानी मुआब्जा रकम वृद्वि गरी जनतालाई उपलब्ध गराउनका लागि समेत माग गरेको छ । जनताका समस्यामा राजनितिक दल र सरकारले टुलुटुलु हेरेर बस्न नमिल्ने भन्दै विज्ञप्तीमा आयोजना नेपाली लगानीमै बनाउनुपर्ने माग गरिएको छ ।
‘सम्बृद्धि’ मुद्धा भाषामा मात्रै सिमित : समाजवादी
सरकारले भनेको सम्बृद्धिको मुद्धा कागज र भाषामा मात्रै सिमित बनेको समाजवादी पार्टी गोरखाले आरोप लगाएको छ । सोमबार विज्ञप्ती प्रकाशित गर्दै समाजवादीले राज्यको ढुलमुले नीतिका कारण आयोजना अन्योलमा परेको बताएको छ ।
जिल्ला अध्यक्ष नारायण खत्रीद्धारा हस्ताक्षरित विज्ञप्तीमा भनिएको छ ‘मुआब्जा वितरण प्रकृया प्रति राज्यपक्ष उदासिन देखिनुले सरकारको समृद्धि भाषामा मात्रै सिमित रहेको स्पष्ट बुझन सकिन्छ ।’
गत शनिबार गोरखा सदरमुकाममा भएको सर्वपक्षिय बहस कार्यक्रममा धादिङ्ग र गोरखाका प्रमुख जिल्ला अधिकारीहरु अनुपस्थित रहनु र आयोजना प्रमुखको भागदौड देख्दा राज्यपक्ष आयोजना अगाडी बढाउने भन्दा भत्काउन तर्फ उद्वत हो कि भन्ने आम जनमानसमा आशंका उत्पन्न भएको समाजवादीको विज्ञप्तीमा उल्लेख छ ।
‘सिंगो नेपाल र नेपालीको गौरव एवं देशको समृद्विमा विशेष महत्व राख्ने बहुउद्धेशिय बुढीगण्डकी जलविद्युत आयोजना भएपनि सरकारले घर जग्गाधनीहरुलाई उचित मुआब्जा दिन ढिलासुस्ती, बहानाबाजी र आनाकानी गरीरहेको स्पष्ट देखिन्छ ।’
खत्रीद्धारा हस्ताक्षरित विज्ञप्तीमा भनिएको छ ‘आयोजना प्रति अफवाह फैलाएर धमिलो पानीमा माछा मार्न खोज्ने तत्वलाई चिन्दै यस्ता प्रवृतिबाट सचेत रहन घर जग्गाधनीहरुलाई अपिल गर्दछौ ।’
मुआब्जा तत्काल तोक्न नेकपाको माग
सत्तारुढ दल नेपाल कम्युनिष्ट पार्टी (नेकपा) गोरखाले बुढीगण्डकी जलविद्युत आयोजनाको डुबान क्षेत्रमा बाँकी रहेको मुआब्जा निर्धारण गरेर तत्काल वितरण गर्न नेपाल सरकार समक्ष माग गरेको छ ।
शनिबार जिल्ला अध्यक्ष लेखबहादुर थापाको अध्यक्षतामा बसेको सचिवालय बैठकले राष्ट्रिय गौरबको बुढीगण्डकी जलाशययुक्त जलविद्युत आयोजनाको आरुघाट बजार र आरखेत सहित बाँकी जग्गा तथा घरगोठ र विरुवाको तत्काल मुआब्जा निर्धारण तथा विवरणको काम तुरन्त अघि बढाउन नेपाल सरकार जलश्रोत तथा उर्जा मन्त्रालय, मुआब्जा निर्धारण समिति र आयोजना इकाइलाई अनुरोध गर्ने निर्णय गरेको हो ।
