गोरखा समाचारदाता
गोरखा – नेपाल कम्युनिष्ट पार्टी नेकपाले आरुघाट क्षेत्रका डुबान प्रभावितले उचित मुआब्जा माग्नु पर्ने बताएको छ ।
शनिवार बसेको जिल्ला सचिवालय बैठकको निर्णय सार्वजानिक गर्दै सचिव प्रेम गुरुङले दुबै पक्षको कमजोरीका कारण मुआब्जा निर्धारणमा ढिलाई भएको संकेत गरे । ‘मुआब्जालिनेले पनि मनासिव हिसावले माग्नु पर्छ, दिनेले पनि उचित ढङ्गको दिनुपर्छ’ उनले भने ‘के आरुघाट र आरर्खेत सिंहदरबार भन्दा महंगो हो त ?’
नेकपा गोरखा तत्काल मुआब्जा निर्धारण गरी वितरण गरिनु पर्छ भन्ने पक्षमा रहेको भन्दै उनले अनावश्यक प्रचारबाजीको विश्वास नगर्न आग्रह गरेका छन् । ‘अनुचित खालका तर्क विर्तकहरु पनि मान्छेले सडकमा पोख्याउन थाले’ उनले भने ‘हामी राष्ट्रिय गौरवका योजनाहरु तदारुकताका साथै अगाडी बढाउनु पर्छ भन्ने पक्षमा छौं, त्यो फास्ट ट्रयाक होस् चाहे बुढीगण्डकी ।’
बुढीगण्डकी आयोजना समयमै सम्पन्न गरेर जनतालाई सेवा सुबिधा दिनुपर्छ भन्ने नेकपाको धारणा रहेको उनले बताए । ‘बुढीगण्डकीको बारेमा कम्युनिष्ट पार्टीले चासै नराखेको होइन’उनले भने ‘सिडिओ लगायतका कर्मचारीको सरुवा भइरहने हुँदा काम नभएको जस्तो देखिन गएको हो ।’
जिल्ला अध्यक्ष लेखबहादुर थापाको अध्यक्षतामा बसेको बैठकले सबै स्थानीय तहका वडाहरुमा कार्यालय स्थापनागर्ने निर्णय गरेकोे छ । यसैगरी सदस्य नविकरण गर्ने, सेल र टोल कमिटी निर्माण गर्ने, बाँकी रहेका वडा कमिटीको सपथ ग्रहण अशोज मसान्तभित्र सम्पन्नगर्ने समेत तय भएको छ ।
सबै स्थानीयतहमा दशै तिहार, छट नेपाल सम्वत तथा इदको शुभकामना आदान प्रदान कार्यक्रम गर्ने, जिल्ला स्तरिय कार्यकता प्रशिक्षण दिनेलगायतका निर्णय समेत गरिएको छ । ‘दुई पार्टी समायोजन भएकाले माथि मिले पनि तल्लो स्तरमा मिलाउन बाँकी काम धेरै छन्’ उनले भने ‘त्यसैले संगठनलाई चलायमान बनाउँदै छलफल, अन्र्तक्रिया, प्रशिक्षण सबैलाई एक साथ लैजाने कार्यक्रम तय भएको छ ।’
बैठकमा सहभागी जिल्ला सचिवालयका पदाधिकारी एवं सदस्यहरुलाई जिल्ला इञ्चार्ज कृष्ण धिताल र सह–इञ्चार्ज अमर तमु प्रशिक्षण दिएकाथिए ।
