काठमाडौँ , साउन १७ गते । भूकम्पका कारण भत्किएर संरक्षणको पखाइमा रहेको धरहराको अवशेष (ठूटो भाग) जोगाउन बुधबार त्रिपाल ओढाइएको छ ।
स्मारकका रूपमा यथावत् राख्न खोजिएको धरहराको ठूटो भागले ओत नपाउँदा वर्षाद्को झरी र चर्को घामले दिनानुदिन जीर्ण भइरहेको देखेपछि काठमाडौंँ महानगरपालिकाका उपप्रमुख हरिप्रभा खड्कीले त्रिपाल ओढाउने निर्णय गर्नुभएको हो ।
उहाँले भन्नुभयो,‘ संरक्षणको पखाईमा रहेको स्मारक दिनहुँ जीर्ण बन्दै गएकाले केही समयको लागि त्रिपालले छोपेर भए पनि त्यसको संरक्षण गर्ने प्रयास गरिएको हो ।’ यसअघि पनि राष्ट्रिय पुनःनिर्माण प्राधिकरणले धरहरालाई वर्षाद्को पानीबाट जोगाउन भनेर प्लाष्टिकले छोप्ने काम भएको थियो । तर एक वर्षमा प्लाष्टिक च्यातिएर झनै दुरवस्थामा पुगेको थियो ।
प्रधानमन्त्री केपी शर्मा ओलीले बारम्बार चासो देखाएर ‘मै बनाउँछु मेरो धरहार’ अभियानको घोषणा गर्नुभए पनि जिम्मेवार निकायले समयमा काम गर्न नसकेपछि धरहरा क्षेत्र दिनप्रतिदिन दुरवस्थामा पुगेको स्थानीयबासीको गुनासो छ ।
राष्ट्रिय पुनःनिर्माण प्राधिकरणले प्रधानमन्त्री ओलीले घोषणा गर्नु भएको अभियानअन्तर्गत नै भूकम्पले ढालेको धरहरालाई भूकम्प स्मारकको रूपमा संरक्षण गर्दै त्यही परिसरमा पुरानै डिजाइनको आधुनिक शैली र अत्याधुनिक प्रविधि युक्त धरहरा निर्माणको परिकल्पना गरेर प्रक्रिया अगाडि बढाइएको छ ।
धरहरा नजिकै रहेको ऐतिहासिक सुन्धरा, गोश्वारा हुलाक कार्यालय र टक्सार विभागको कार्यालयले ओगटेको जमिनलाई समेत समेटेर नयाँ स्मारक बनाउने योजना तयार भएको छ । त्यसका लागि प्राधिकरणले बोलपत्र आह्वनमार्फत् पाँचवटा कम्पनीको छनोट समेत गरिसकेको छ ।
छानिएका कम्पनीमाथि शङ्का
तर छानिएका ‘ज्वाइन्ट भेन्चर’ निर्माण कम्पनीहरूले पेश गरेका कागजातहरूका लगाइएको छाप शङ्कास्पद देखिएको भन्दै प्रधानमन्त्री कार्यालयले खरिद प्रक्रिया रोक्ने आदेश दिएपछि काम रोकिएको प्राधिकरणका सहसचिव राजु मानन्धरले जानकारी दिनुभयो । सहसचिव मानन्धर भन्नुहुन्छ,‘ आधिकारिकताबारे उजुरी गरेपछि कुन कम्पनीलाई निर्माणको जिम्मा दिने भन्ने निर्णय प्राधिकरणले गर्न सकेको छैन ।’
उहाँका अनुसार ज्वाइन्ट भेन्चर कम्पनीको आधिकारिकतामाथि प्रश्न उठेपछि बोलपत्र हालेका छ वटै कम्पनीका कागजात प्रधानमन्त्री कार्यालयमा गरिएको छ । छ कम्पनीमध्ये प्राधिकरणले पाँच कम्पनीलाई छनोट गरेको थियो ।
छानिएका कम्पनीको आधिकारिताका बारेमा बुझ्न प्राधिकरणले परराष्ट्र मन्त्रालयमार्फत काठमाडौँस्थित चिनियाँ दूतावासलाई पत्राचार गरेको दुई हप्ता भइसके पनि त्यसको जवाफ आइनसकेको प्राधिकरणका प्रवक्ता कृष्णप्रसाद दवाडीले जानकारी दिनुभयो । उहाँ भन्नुहुन्छ,‘ पत्राचारको कुनै जवाफ आइनसकेकाले कुनै काम अगाडि बढेको छैन ।’
स्वदेशीकै लगानीले धरहरा बनाउने अभियान प्रधानमन्त्री ओलीले सुरु गर्नुभएपछि राष्ट्रिय बाणिज्य बैङ्कमा खोलिएको कोषमा हालसम्म २४ करोड रुपियाँ जम्मा भएको प्राधिकरणले जनाएको छ । अन्य काम सुरु नहुँदा अहिले यो कोषमा रकम जम्मा हुन पनि रोकिएको छ । यस बाहेक धरहरा निर्माणको लागि नेपाल टेलिकमले एक अर्ब रुपियाँ उपलब्ध गराउने घोषणा नै गरिसकेको छ ।
gorkhapatraonline
