हुम्ला — राष्ट्रिय सडक सञ्जालमा नजोडिए पनि हुम्लामा पछिल्लो समय गाडी किन्ने लहर चलेको छ । सदरमुकाम सिमकोटसम्म उत्तर–दक्षिण २६ किलोमिटर ट्रयाक खुलेपछि व्यवसायीबीच चारपांग्रे सवारी भित्र्याउने प्रतिस्पर्धा चलेको हो ।
यात्रु ओसारपसारका लागि जिप र सामान ढुवानीका लागि ट्याक्टर खरिद गर्न थालिएको छ । राम्रो आम्दानी हुने भएपछि व्यवसायीले महँगो भाडा तिरेर हेलिकप्टरबाट ढुवानी गरेका हुन् । व्यवसायी लोकजंग शाहीका अनुसार हेलिकप्टरमार्फत सुर्खेतबाट सिमकोटसम्म गाडी ढुवानी गर्दा करिब १० लाख रुपैयाँ खर्च हुने गरेको छ ।
सिमकोटमा अहिले आधा दर्जन जिप र टिपर सञ्चालनमा छन् । सामान ढुवानीका लागि एक दर्जन ट्याक्टर पनि प्रयोगमा आएका छन् । सडक निर्माणका लागि सिमकोट र आसपासका क्षेत्रमा एक दर्जन एस्काभेटर भित्रिएका छन् ।
कर्णाली करिडोरअन्तर्गत सिमकोटदेखि दक्षिण खार्पुनाथसम्म ११ किलोमिटर र उत्तर हेक्पा खोलासम्म १५ किलोमिटर ट्रयाक खुलेको छ । ट्रयाक खुलेको सडकमा स्थानीयले गाडी सञ्चालन गर्दै आएका छन् । साना गाडीले यात्रु ओसारपसार गर्ने र ट्याक्टरले निर्माण सामग्री ढुवानी गर्छन् ।
व्यवसायी शाहीका अनुसार इन्धन महँगो भए पनि गाडी सञ्चालनको प्रतिस्पर्धा चलेको छ । मुगु सदरमुकाम गमगढीबाट खच्चडमा इन्धन ढुवानी गरिरहेको उनले बताए । गाडीको ढुवानी भाडा र इन्धन महँगो भएकाले व्यवसायीले ११ किलोमिटर सडकमा मनपरी भाडा लिने गरेका छन् । व्यवसायीले तीन सयदेखि पॉच सयसम्म भाडा असुल्ने गरेको स्थानीयको भनाइ छ ।
गाडी सञ्चालनमा आएपछि मानसरोवर–कैलाश तीर्थयात्रा गर्न आएका भारतीय तीर्थयात्रीसमेत लाभान्वित भएका छन् । कतिपय भारतीय तीर्थयात्री खार्पुनाथस्थित शिवजी मन्दिरमा दर्शनका लागि जाने गरेका छन् । स्थानीय र बाहिरबाट आएकाहरूले गाडी रिजर्भ गरेर खार्पुनाथसम्म आउजाउ गर्ने गरेका छन् । यो वर्ष एक सय ५० बढी भारतीयले खार्पुनाथ मन्दिर दर्शन गरेको व्यवसायी शाहीले बताए ।
विमानस्थलदेखि होटलसम्म भारतीय पर्यटकलाई ओसार्नका लागि स्थानीय होटलले गाडी खरिद गर्न थालेका छन् । जिल्लामा दर्जनौं गाडी सञ्चालनमा आए पनि यातायात कार्यालय नहुँदा ती गाडी दर्ता भएका छैनन् ।
kantipurdaily
