काठमाडौँ, वैशाख १९ गते । पार्टीको विधान संशोधन नभएसम्म नेपाली काँग्रेसमा पदाधिकारीको सङ्ख्या नबढ्ने भएको छ । निर्वाचनको क्रममा काँग्रेसमा अरू पार्टी पनि एकीकृत भएकाले सबैलाई मिलाएर लैजान पदाधिकारीको सङ्ख्या बढाउन नेताहरूले माग गर्नुभएको छ ।
काँग्रेस केन्द्रीय सदस्य बालकृष्ण खाँडले विधान संशोधन अगाडि हालको पदाधिकारी सङ्ख्या बढाउने सम्भावना नरहेको बताउनुभयो । उपसभापति, महामन्त्री र सहमहामन्त्री गरी तीन जना मनोनयन गर्ने व्यवस्था विधानमा छ ।
भदौमा बस्ने महासमितिको बैठकले विधान संशोधन गरेपछि पदाधिकारीको सङ्ख्या बढ्न सक्छ तर अहिले सम्भावना छैन, उहाँले भन्नुभयो । काँग्रेसमा उपसभापति पदका आकाङ्क्षी धेरै भएपछि अहिले नेताहरूको व्यवस्थापन कठिन बनेको छ । प्रजातान्त्रिक काँग्रेसको कार्यवाहक सभापति भएर जनआन्दोलनको क्रममा १२ बुँदे समझादारीपत्रमा हस्ताक्षर गर्ने नेता गोपालमान श्रेष्ठ अहिले उपसभापति पदको दाबेदार हुनुहुन्छ । सभापति देउवाले आफूलाई उपसभापति बनाउने आश्वासन दिनुभएको दाबी नेता श्रेष्ठले गर्दै आउनुभएको छ ।
नेता विमलेन्द्र निधि पनि उपसभापति पदको दाबेदार हुनुहुन्छ । पार्टीको पूर्वमहामन्त्री समेत रहनुभएका निधि सभापति देउवा निकट प्रभावशाली नेता मानिनुहुन्छ ।
यसैगरी, निर्वाचनको क्रममा १२ वर्षपछि दलबलसहित काँग्रेसमा फर्कनुभएका नेता विजयकुमार गच्छदारलाई पार्टी एकीकरणको क्रममा उपसभापति पद दिने भद्र सहमति भएको विषयलाई नेता गच्छदारले बैठकमै उठाउनुभएको थियो ।
यस्तै, नेतृत्व तहमा महिला नेतृत्व पुग्नुपर्ने भन्दै महिलाबाट उपसभापति हुनुपर्ने माग महिला नेताहरूले राख्दै आउनुभएको छ । कतिपयले नेताले त्यसका लागि केन्द्रीय सदस्य सुजाता कोइराला उपयुक्त हुने धारणा पनि राख्दै आएका छन् । सभापति देउवा निकटका एक केन्द्रीय सदस्यले पदाधिकारी मनोनयन गर्ने अधिकार सभापतिको भएको बताउँदै विवेकसम्मत निर्णय हुने दाबी गर्नुहुन्छ ।
पदाधिकारी मनोनयनपूर्व सहमतिको दबाब बढेपछि उपसभापति, महामन्त्री र सहमहामन्त्री तीन पदमध्ये कुनै एक पद वरिष्ठ नेता रामचन्द्र पौडेल तथा महामन्त्री कोइराला निकट नेताले पाउने सम्भावना पनि छ ।
यस्तै, महामन्त्री पदका लागि प्रभावशाली युवा नेताहरूको दौडधुप छ भने सहायक महामन्त्रीमा पनि धेरै नेताहरूको दाबी छ । त्यसैगरी पार्टीका ४२ वटा विभाग पनि हाल रिक्त छन् । काँग्रेसलाई एकजुट बनाएर लैजान कि त वरिष्ठ नेता वा नेता पद बढाएर जानुपर्ने वा पाँच उपसभापति, दुई महामन्त्री र सात सहमहामन्त्री बनाएर जाँदा पार्टीलाई एक ढिक्का बनाएर लैजान सजिलो हुने भनाइ कतिपय नेताको छ । सात सहमहामन्त्रीले सात प्रदेशको संयोजक बनाएर सङ्गठनको जिम्मा दिनु राम्रो हुने धारणा पनि कतिपय केन्द्रीय सदस्यको छ ।
तर, पार्टी प्रवक्ता विश्वप्रकाश शर्माले १४ दिनसम्म चलेको कार्य समितिको बैठकमा त्यस्तो कुरा नआएको बताउनुभयो । उहाँले भन्नुभयो, ‘केन्द्रीय कार्य समितिको बैठकमा यी कुरा आएका छैनन् । ’ उहाँले विधान मस्यौदा समिति गठन भएपछि त्यस विषयमा छलफल हुन सक्ने जानकारी दिनुभयो ।
पदाधिकारी मनोनयन २१ गते
पदाधिकारी मनोनयन गर्न सभापति शेरबहादुर देउवाले सोमबार बोलाउनुभएको बैठक शुक्रबारका लागि सरको छ । महामन्त्री डा. शशाङ्क कोइरालाको आग्रहमा बैठक वैशाख २१ गते शुक्रबारका लागि सारिएको हो । बैठकबाट पदाधिकारी मनोनयन गर्ने तयारीमा सभापति देउवा हुनुहुन्छ । वरिष्ठ नेता रामचन्द्र पौडेलले सहमति बेगर पदाधिकारी मनोनयन गरिएमा आफूहरूलाई मान्य नहुने बताउनुभयो ।

gorkhaptraonline