उनी चुनावी कार्यक्रमका सिलसिलामा शनिबार आफ्नो निर्वाचन क्षेत्र पर्ने माडी पुगेका थिए । तर उनी न त नजिकैको घटनास्थल पुगेको न उनले घटनाका पीडितहरुलाई नै भेटेको बीबीसीका चितवन संवाददाता ईश्वर जोशीले जनाए ।
वाम गठबन्धनको चुनावी सभामा भाग लिन माडी गएका प्रचण्डले माडी घटनाबारे आफूले त्यतिखेर नै माफी मागेको बताए । उनले भने, “बाँदुरमुढे घटनाबारे मैले सुनेपछि पार्टीको सशस्त्र संघर्षको सबैभन्दा ठूलो गल्ती भयो भनेर भोलिपल्टै वक्तव्य निकालेको थिए”।
प्रचण्डले यसअघि पटकपटक माडी जाने बताउँदै आएपनि उनी त्यहाँ पुगेका थिएनन् । माडी समेत रहेको चुनावी क्षेत्रमा प्रचण्डको उम्मेदवारीलाई निकै अर्थपूर्ण रुपमा हेरिएको छ । अध्यक्ष प्रचण्डले माडी घटनाका दोषीहरुलाई पार्टीले कारबाही गरिसकेको र उक्त घटनाको छानविन सत्य निरुपण तथा मेलमिलाप आयोगबाट पनि भइरहेको बताए।
उनले भने, “कुनै पनि घटनाको प्रमुख दोषी ठहर भएमा र त्यो गम्भीर प्रकृतिको अपराध ठहर भएमा उनीहरुमाथि कारबाही हुन्छ” । अध्यक्ष प्रचण्डले माडीको बसन्तपुर बजारमा एक कार्यक्रममा द्वन्द्वकालमा मारिएका माओवादीका नेताकार्यकर्ताहरुको सम्झनामा माल्यार्पण गरेपनि नजिकै रहेको बाँदरमुढे घटनास्थलमा बनाइएको स्मारकमा भने जाने चाहना देखाएनन्।
निकै तामझाम र कडा सुरक्षा व्यवस्थाबीच भएको कार्यक्रममा बाँदरमुढे घटनाका पीडितहरुको भने उपस्थिति देखिएन । बाँदरमुढे घटनाका पीडित कृष्ण अधिकारीलाई टेलिफोन सम्पर्क गर्दा उनले आफूहरलाई गिरफ्तार गर्ने सुनेपछि घरमा नै बसेको बताए ।
बाँदरमुढे घटनाका पीडितहरु भने आफूहरुको मागबारे अध्यक्ष प्रचण्डसँग नै वार्ता गर्ने बताएका छन् । उक्त घटनामा ३८ जनाको मृत्यु भएको थियो भने ७२ जना घाइते भएका थिए ।
BBC
