राष्ट्रपति भण्डारीले पूर्वीय दर्शनले अङ्गीकार गरेका मानवीय मूल्य र मान्यताको प्रचार उच्च नैतिकतायुक्त मानव समाजको निर्माण, परोपकारी भावनाको विकास एवं स्वच्छ र शान्त जीवन पद्धति विकास गर्न धार्मिक महोत्सव फलदायी हुने उहाँले विश्वास व्यक्त गर्नुभयो ।

यसै प्रसंगमा आफ्ना पूर्वजहरु (पाण्डे) गोरखाबाट बसाइँ–सराइ हुँदै भोजपुर (राष्ट्रपति भण्डारीको माइती) गएको ऐतिहासिक तथ्यको स्मरण गर्दै राष्ट्रपति भण्डारीले पुर्खाको थातथलोमा पुनः एकपटक भेटघाट गर्ने अवसर मिलेकोमा हर्षको अनुभूति भएको बताउनुभयो ।

एकीकरणको अभियानदेखि नै साहस, वीरता, एकता र जातीय सहिष्णुताको ऐतिहासिक उदाहरण प्रस्तुत गरिसकेको गोरखा एउटा गौरवशाली भौगोलिक क्षेत्रका रुपमा नेपालको राजनीतिक भूगोलमा सदा अङ्कित रहनेछ भन्ने विश्वास लिएको पनि उहाँको भनाइ रहेको थियो ।

शिक्षा, शान्ति र समुन्नतिको महत्वपूर्ण आधार भएको र चेतना र जागरणको माध्यम पनि शिक्षा भएको उल्लेख गर्दै राष्ट्रपति भण्डारीले मौलिक मानव अधिकारका रुपमा रहेको शिक्षाको पहुँच सबैमा पुरयाउनुपर्ने बताउनुभयो ।

स्थानीय तहको निर्वाचन उल्लासमय वातावरणमा सम्पन्न भएको छ भने चाँडै नै प्रदेश र संघीय संसद्लगायत निर्वाचन हुन गइरहेको बताउँदै राष्ट्रपति भण्डारीले यी सबै निर्वाचन सम्पन्न भइसक्दा नेपालको लोकतान्त्रिक प्रणाली र राज्य पुनःसंरचना प्रक्रियाले महत्वपूर्ण इतिहास रच्ने महसुश गरेको बताउनुभयो ।

प्राकृतिक सम्पदा र सांस्कृतिक विविधताले सम्पन्न गोरखा, लमजुङ र तनहुँ जिल्लाको सङ्गमस्थल एवं पवित्र मस्र्याङ्दी र चम्पावती नदी तट पालुङटारमा अवस्थित यस नगरलाई नेपाल सरकारले स्मार्ट सिटीका रुपमा घोषणा गरेसँगै स्थानीय जनसमुदायको ठूलो उत्साहका साथ शैक्षिक र आर्थिक पूर्वाधार विकासका लागि प्रक्रियागत रुपमा लागिपर्नु खुशीको विषय भएको राष्ट्रपति भण्डारीले बताउनुभयो ।

घोषित नमूना गाउँ तथा नगर क्षेत्रको समृद्धिका निमित्त विकासको बृहत्तर गुरुयोजना तर्जुमा गरी प्रभावकारिताका साथ कार्यान्वयन गर्नुपर्ने खाँचो रहेको उहाँले बताउनुभयो । हाम्रो हरेक गाउँ र नगरको विकासबाटै समग्र नेपाल समृद्ध हुने भएकाले यस दिशामा एउटा उत्कृष्ट उदाहरण प्रस्तुत गर्न पालुङटार नगरी अग्रसर भएको भन्ने लागेको राष्ट्रपति भण्डारीले बताउनुभयो ।

सो अवसरमा राष्ट्रपतिले यहाँ अवस्थित नदी प्रणालीको सदुपयोग गरी विकासका निमित्त सिँचाइको यथोचित प्रबन्ध गर्न, स्वास्थ्य सेवालाई विस्तार र सृदृढ पारी जनस्वास्थ्यमा सबैको पहुँच पु¥याउन, पर्यटन प्रवद्र्धन गरी वैज्ञानिक ढङ्गले बस्ती विकास गर्न खानेपानी, सडक र शिक्षा विकासमा जोड दिन सबैको ध्यानाकृष्ट गर्नुभएको थियो । भूकम्पले यस जिल्लामा जनधनको ठूलो क्षति पु¥याएकोमा गहिरो दुःख लागेको राष्ट्रपति भण्डारीको भनाइ रहेको थियो ।

भूकम्पपछिको पुनःनिर्माणलाई जोड दिने नेपाल सरकारको नीतिबमोजिम आफू स्वयं भूकम्पको केन्द्रविन्दु रहेको बारपाक पुगेर नजिकबाट अनुभूत गरी पुनःनिर्माण कार्यलाई तीव्रता दिन आह्वान गरेको स्मरण गर्नुभयो ।

जोखिम क्षेत्रको संवेदनशीलतालाई मध्यनजर राखी व्यक्तिगत संरचना, ऐतिहासिक, सांस्कृतिक तथा पुरातात्विक सम्पदा, शैक्षिक संस्था एवं सरकारी, सामुदायिक क्षेत्रको पुनःनिर्माणलाई तीव्रता दिन राष्ट्रपति भण्डारीले सम्बद्ध सबैपक्षको ध्यानाकृष्ट गर्नुभएको थियो ।

जलवायु परिवर्तनले गर्दा तीव्ररुपमा प्राकृतिक विपत्तिका घटना घटिरहेको सन्दर्भमा गुणस्तरीय एवं वातावरण मैत्री र मौलिकतालाई ध्यानमा राखी भौतिक संरचना निर्माणमा यथोचित ध्यान पु¥याउनुपर्ने राष्ट्रपति भण्डारीको भनाइ थियो ।

कार्यक्रम महोत्सव मूल समारोह समितिका अध्यक्ष प्रकाशचन्द्र खनालको सभापतित्वमा भएको थियो । सो अवसरमा पूर्वप्रधानमन्त्री बाबुराम भट्टराई, पूर्वउपप्रधानमन्त्री नाराणकाजी श्रेष्ठ, पूर्वमन्त्री वाचस्पति देवकोटा, सांसद कमला पन्त, पालुङटार नगरपालिका प्रमुख दीपकबाबु कँडेल लगायतले यस क्षेत्रको विकासका लागि सबै प्रकारको सहयोग गर्ने प्रतिबद्धता व्यक्त गर्नुभएको थियो ।

महोत्सवमा प्रमुख कथावाचन गोविन्दशरण महाराजले गर्नुभएको छ । पालुङटारलाई प्राविधिक शिक्षा तथा अन्तर्राष्ट्रिय मापदण्डअनुसारको नेपालकै नमूना शैक्षिक केन्द्र निर्माण गर्नका लागि असोज २२ देखि २९ गते सम्म महोत्सवको आयोजना गरिएको हो । आगामी पाँच वर्षभित्र राष्ट्रिय तथा अन्तर्राष्ट्रिय मापदण्ड अनुसारको क्याम्पसको स्थापना गर्ने पनि समितिले जनाएको छ ।

रासस