कैलासबावु श्रेष्ठ/गोरखा
चैत्र १ गते । गोरखा सदरमुकाममा प्रधान कार्यालय रहेको क्षेत्रियस्तरको मनास्लु विकास बैंकको बिशेष साधारण सभा सम्पन्न भएको छ । राष्ट्र बैंकको निति अनुसार राष्ट्रिय स्तरको बैंकमा स्थापित हुन पोखरामा रहेको ओम डेभलपमेण्ट बैंक लि.संग मर्जर गर्ने सम्वन्धमा पनि विशेष साधारण सभाले केही महत्वपूर्ण निर्णयहरु गरेको बैंकका नि. महाप्रवन्धक दुर्गा राम पुरीले जानकारी गराउनु भयो ।
०६७ सालको मंसिर २७ गते देखी बैंकले गोरखा, तनहु र चितवन गरि तिन जिल्लालाई कार्यक्षेत्र बनाई विभिन्न शाखा मार्फत काम गर्दै आईरहेको छ । आफ्नो कार्यक्षेत्र भित्र राम्रो प्रभाव पार्न सफल बैंकले वर्तमान वित्तिय बजारको आवाश्यकता, नितीगत ब्यवस्था लगायतका पक्षहरुलाई आत्मसाथ गरी ओम डेभलपमेण्ट बैंक लि. सँग मर्जरमा जाने सम्वन्धमा विशेष निर्णहरु गर्नका आइतबार सदरमुकाममा विशेष बार्षिक साधारण सभा सम्पन्न गरेका हो ।
संस्थापक शेयरधनीहरु तथा साधारण शेयरधनिहरुको उल्लेख्य सहभागिता रहेको साधारण सभाको बैंकका अध्यक्ष श्री विजय मल्लले उद्घाटन गर्नु भएको थियो । बैंकको विशेष साधारण सभामा संचालक समितिको तर्फबाट अध्यक्ष मल्लले गाभ्ने/गाभिने सम्वन्धि प्रस्तुत विशेष प्रतिवेदन, मनास्लु विकास बैंक लिमिटेड र ओम डेभलपमेन्ट बैंक लिमिटेड एक आपसमा गाभ्ने (मर्ज गर्ने) प्रयोजनका लागि डिडीए प्रतिवेदनको आधारमा निर्धारण गरिएको शेयर आदानप्रदान अनुपातलाई पारित, मर्जर सम्बन्धमा भएका सहमती पत्र, सम्झौताहरुको अनुमोदन गर्ने, मर्जर गर्ने प्रयोजनका लागि ५ वर्षको व्यावसायीक योजना तथा प्रक्षेपण पारित गर्ने, मर्जर सम्वन्धमा कुनै विशेष थप संशोधन गर्न नियमनकारी निकाय वा कार्यालयबाट कुनै निर्देशन दिएमा सो समेत मिलाई संशोधन गर्न तथा मर्जर सम्बन्धमा गर्नुपर्ने अन्य सम्पूर्ण कार्यहरु गर्न संचालक समितिलाई पूर्ण अख्तियारी प्रदान गर्ने लगायतका विशेष निर्णयहरु सभाले सर्वसम्मती रुपमा पारित गरेको छ ।
बैंकले चालु आ.व. २०७३/०७४ को पौष मसान्त सम्ममा रु २ अर्व २४ करोड ५१ लाख निक्षेप संकलन गरि रु १ अर्व ९३ करोड कर्जा लगानी गरि रु ४ करोड ८२ लाख संचालन मुनाफा कमाउन सफल भएको छ । बैंकको हाल केन्द्रिय कार्यालय समेत १० वटा शाखा कार्यालयहरु र १ एक्स्टेन्सन काउन्टर संचालनमा रहेका छन् भने बैंकको खराव कर्जा शुन्य रहेको छ ।
नेपाल राष्ट्र बैंकको अन्तिम स्वीकृती पश्चात यथा सम्भव संयुक्त कारोवार संचालन गर्ने योजनामा रहेका दुवै बैंकको चालु आ.व. को पौष मसान्त सम्मको तथ्यांकलाई आधार मान्दा मर्जर पश्चात वन्ने राष्टियस्तरको विकास बैंकको रु १५ अर्व २४ करोड निक्षेप, रु १३ अर्व २७ करोड कर्जा लगानी, रु ३४ करोड ८२ लाख संचालन मुनाफा, ४२ वटा शाखा कार्यालय, ६ वटा एटिएम सेन्टर, १ लाख ६० हजार ग्राहक संख्या तथा ३४० जना कर्मचारीहरु पुग्नेछ ।
फोटो सौजन्य दुर्गा राम पुरी