कैलासबावु श्रेष्ठ/गोरखा
पौष २३ गते । गोरखा सदरमुकाममा केन्द्रिय कार्यालय रहेको मनास्लु बिकास बैंकको छैठौ साधारण सभा सम्पन्न भएको छ ।
गोरखा सदरमुकामको होटल बिसौनीमा सम्पन्न भएको साधारण सभाले आ.ब.०७२/०७३ सम्मको संचित मुनाफाबाट १८ प्रतिशत बोनस शेयर तथा ०.९५ प्रतिशत नगद लाभांश (करका लागि) शेयरधनीहरुलाई वितरण गर्ने निर्णय भएको बैंकका नि.महाप्रन्धक दुर्गाराम पुरीले जानकारी दिनु भयो । बोनस शेयर तथा यस अघिको हकप्रद शेयर समायोजन गरे पश्चात बैंकको चुक्ता तथा जारी पुजी ३० करोड ८३ लाख २९ हजार ५ सय ६० पुगेको छ भने अधिकृत पुजी मात्रै ५५ करोड भएको छ ।
पोखराको ओंम डेभलपमेन्ट बैंक संग मर्जर भएको यो बैंकले ०७२/०७३ को यही आ.ब.को तुलनामा निक्षेप तर्फ ५८.१६ प्रतिशत बृद्वि गरी २ अर्ब १२ करोड ५६ लाख संकलन गर्न सफल भएको र कर्जा तर्फ ४४.६५ प्रतिशत बृद्वि गरी १ अर्ब ५९ करोड ४७ लाख प्रवाह गरेको जानकारी गराइको थियो । त्यसै गरी नाफा तर्फ अघिल्लो आ.ब.को तुलनामा ७७.९३ प्रतिशत बृद्वि भई ६ करोड ९४ लाख १९ हजार संञ्चालन मुनाफा कमाउन समेत सफल भएको छ । 
गोरखा, तनहुँ र चितवन कार्य क्षेत्र रहेको यो बैंकले निकै छोटो समयमा ब्यापारी, ब्यवसायी तथा संघ संस्था तथा सर्व साधारणहरुलाई प्रभाव पार्न सफल भएको थियो । बैंकको हाल सम्म गोरखाको आरुघाट, लक्ष्मीबजार र तनहुँँको तुरतुरे, डुम्रे, दुलेगौडा र आँबुखैरेनी बजारमा शाखा बिस्तार भै सकेको छ भने चितवनको नारायणगढ बजार र पर्सा र टाँढी बजारमा शाखा विस्तार भै सकेको छ भने गोरखाकै मनकामनामा केही दिन भित्रै शाखा सञ्चालनमा आउने तयारी भै रहेको छ । 
बैंकले आफ्ना ग्राहकका लागि सेफ डिपोजिट लकर, एबिबीएस, एटिम, एसएमएस बैकिङ्ग र अन लाइन चेक क्लियरेन्स सेवा दिदै आएको छ ।
