१९ भदौ, अफगानिस्तान । अफगानिस्तानको जाबुल प्रान्तमा आइतबार बिहान बस र इन्धन बोकेको ट्यांकर ठोक्किँदा ३६ जनाको मृत्यु भएको छ । दुर्घटनामा अन्य २८ जना घाइते भएका छन् ।
दुर्घटनाका कारण आगो लागेको र महिला तथा बालबालिकासहित धेरै व्यक्तिको शरीर नचिनिने गरी जलेको जाबुल प्रान्तका प्रशासक बिस्मिल्लाह अफगानमलले जानकारी दिएका छन् ।
कान्दाहारबाट काबुलतर्फ गइरहेको अवस्थामा यात्रु बस इन्धन ट्यांकरसँग ठोक्किएका थिए ।
जाबुलका प्रहरी उपप्रमुख गुलाम जिलानी फराहीका अनुसार घाइतेहरुलाई प्रान्तीय केन्द्र कलात र छिमेकी कान्दाहार प्रान्तका अस्पतालमा उपचारका लागि लगिएको छ ।
युद्धग्रस्त अफगानिस्तानमा विश्वकै सबैभन्दा डरलाग्दा भनी चिनिएका सडकखण्ड छन् । ती सडकखण्डको अवस्था निकै खराब हुने र चालकहरुले यातायातको नियम पनि पालना नगर्ने भएकाले धेरै दुर्घटना हुने गरेको अधिकारहरु बताउँछन् ।
गत मे महिनामा गजनी प्रान्तमा दुई यात्रुबाहक बस तथा एक इन्धन ट्यांकर दुर्घटना हुँदा कम्तीमा ७३ व्यक्तिको मृत्यु भएको थियो ।
onlinekhabar
