गाेरखा । राष्ट्रपति कार्यालय शीतल निवासबाट जेनजी आन्दाेलनका क्रममा भदौ २४ गते लुटिएको हात्तीको दाह्रासहित ५ जनालाई प्रहरीले पक्राउ गरेको छ ।
हात्तीको दाह्रा बिक्री वितरण तथा सञ्चय गरिरहेको भन्ने सूचनाको आधारमा काठमाडौं उपत्यका अपराध अनुसन्धान कार्यालयको टोलीले ५ जनालाई पक्राउ गरेको हाे ।
पक्राउ पर्नेमा गाेरखाका टेकप्रसाद गुरूङ, गाेरखाकै सन्तबहादुर भुजेल, काठमाडौंको मनमैजु बस्ने राजिब महर्जन, बसन्तपुर बस्ने आयुष महर्जन र बैतडीका पुरन बोहरा छन् । प्रहरीले उनीहरूबाट हात्तीका दाह्रा समेत बरामद गरेको छ ।
प्रहरीले गोप्य सूचना पाएपछि प्रहरी राजिब महर्जनको घरमा पुगेको थियाे । उनको घरको खाली जग्गामा दात्तीका दाह्रा गाडेर राखेको अवस्थामा फेला परेको हो । उनको कोठामा ट्रामाडोल औषधि १५० वटा क्याप्सुल समेत प्रहरीले फेला पारेको छ ।
उनीमाथि सोधपुछ गरी प्रहरी पुरन बोहरालाई पक्राउ गरिएको थियो । उनले पनि २ टुक्रा दाह्रा सन्तबहादुर भुजेलसँग भएको बताएका थिए ।
उनले भने आनो कोठामा बोराभित्र बेरेर २ वटा दाह्रा राखेका थिए । उनीहरूबाट बरामद भएको हात्तीका दाह्रा राष्ट्रपति कार्यालय शीतलनिवासबाट भदौ २४ गते लुटिएको स्रोतले बतायो ।
प्रहरीले उनीहरूमाथि लागुऔषध नियन्त्रण ऐन २०३३ र राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम कसुरमा अनुसन्धान गर्ने भएको छ।
पक्राउ परेकाहरुलाई आवश्यक कारवाहीकाे लागि जिल्ला प्रहरी परिसर भद्रकाली र डिभिजन वन कार्यालय हात्तीसारमा पठाइएको छ ।