गोरखा । गोरखामा राष्ट्रिय आर्थिक गणना २०८२ सुरु भएको छ । मंगलवार देखि असार ७ गतेसम्म सञ्चालन हुने आर्थिक गणना सुरु भएकाे जिल्ला तथ्याङ्क अधिकृत लोक प्रशाद ढुंगानाले जानकारी दिए ।
आर्थिक गणनाका लागि जिल्लाका सरोकारवालासँग छलफलसँगै स्थलगत तथ्याङ्क सङ्कलनमा खटिने गणक तथा सुपरीवेक्षकलाई तालिम समेत प्रदान गरिएको थियाे । साथै गणक तथा सुपरीवेक्षकलाई तथ्याङ्क सङ्कलनका लागि आवश्यक पर्ने सम्पूर्ण सामग्री प्रदान गरिएको उनले बताए ।
‘अर्थतन्त्र मापनका लागि आर्थिक गणना’ भन्ने मूल नारासहित राष्ट्रिय आर्थिक गणना २०८२ सञ्चालन गर्न लागिएको हो । यहाँ स्थलगत तथ्याङ्क सङ्कलनका लागि ४१ जना गणक र ६ जना सुपरीवेक्षक छनोट गरिएको छ ।
गणक तथा सुपरीवेक्षकलाई ५ दिनको तालिम मार्फत राष्ट्रिय आर्थिक गणनाको परिभाषा, उद्देश्य, आवश्यकता, महत्व, गणना विधि, गणनामा प्रयोग गरिने फाराम, गणनाले समेट्ने र नसमेट्ने क्षेत्र, गणक तथा सुपरीवेक्षणको काम, कर्तव्य, जिम्मेवारी, पेशागत आचरण लगायतका कुराका अतिरिक्त गणकले भर्नुपर्ने फाराम तथा प्रश्नावली भर्ने तरिका, प्लटकोडको प्रयोग बारेमा सिकाएको थियाे ।
आर्थिक गतिविधिको वास्तविक अवस्था, स्वरुप तथा संरचना पहिचान गरी राष्ट्रिय अर्थतन्त्रसम्बन्धी तथ्याङ्क अद्यावधिक गर्नका लागि आर्थिक गणना सञ्चालन गर्न लागिएको हो । गणनाबाट प्राप्त तथ्याङ्कले समग्र आर्थिक अवस्थाको यथार्थ चित्र प्रस्तुत गर्नुका साथै योजना निर्माणमा सहयोग पुग्नेछ ।
गणना सम्पन्न भएपछि आधारभूत आर्थिक तथ्याङ्कको अभिलेखीकरण, उद्योग व्यवसायमैत्री नीति निर्माण, अर्थतन्त्रको सुदृढीकरण तथा नयाँ लगानीकर्ताको विवरण सङ्कलनमा सहयोग पुग्ने छ । राष्ट्रिय तथ्याङ्क कार्यालयले दोस्रो पटक आर्थिक गणना गर्न लागेको यस जिल्ला तथ्याङ्क अधिकृत ढुङगानाले बताए ।
पहिलो आर्थिक गणना २०७५ मा गरिएको थियो । सम्पूर्ण उद्योग र व्यवसायको विवरण प्राप्त गर्न आधुनिक प्रयोग स्वरुप आर्थिक तथ्याङ्क लिनका लागि राष्ट्रिय आर्थिक गणना २०८२ गर्न लागिएको हो ।
यसमा नेपालस्तरीय औद्योगिक वर्गीकरणका २१ वटा खण्डमध्ये १८ वटा खण्डका आर्थिक क्रियाकलापलाई समेटिने छ । जसमध्ये खण्ड ए अन्तर्गत कृषि, वन तथा मत्स्यपालनअन्तर्गत दर्ता भएका मात्र प्रतिष्ठानलाई समेटिने भएको छ ।
