गाेरखा । नेपाली कांग्रेस केन्द्रीय अनुशासन समितिकाे आज बसेकाे बैठकले नेता पूर्णबहादुर खड्कालाई सचेत गराएको छ । केन्द्रीय कार्यालय सानेपामा बसेको बैठकले नेता खड्कालाई सचेत गराउने निर्णय गरेको हो ।
खड्काले चैत १४ गते कार्यवाहक सभापतिको हैसियतमा विज्ञप्ति जारी गरेका थिए । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ परेको विषयमा खड्काले विज्ञप्ति जारी गरेका थिए ।
तत्कालीन सभापति शेरबहादुर देउवा पक्षले खड्काकै अगुवाइमा समानान्तर गतिविधि गर्दै आएका छन् । फागुन २१ को प्रतिनिधि सभा निर्वाचनसँग सम्बन्धित ५०७ उजुरी अनुशासन समितिमा प्राप्त भएको छ ।
स्वतन्त्र र प्रस्तावक समर्थक रहेका, उम्मेदवारविरूद्ध प्रत्यक्ष सहभागी भई लागेका, विपक्षलाई टेवा पुर्याएका, मत नमागी बसेका र कांग्रेसकै टिकटबाट जनप्रतिनिधि भए पनि विपक्षीलाई सहयोग गरेकाहरू विरूद्ध अनुशासन उजुरी आएको छ ।
उजुरी आएकाहरूलाई ७ दिनभित्र स्पष्टीकरण दिन भनिएको छ ।