एजेन्सी । इराकको राजधानी बग्दादबाट १ जना अमेरिकी स्वतन्त्र पत्रकार शेली किट्टल्सनको अपहरण भएको छ । इराक र अमेरिकी अधिकारीहरूका अनुसार यस अपहरणमा इरान समर्थित सशस्त्र समूह कताइब हिजबुल्लाहसँग आबद्ध व्यक्तिको संलग्नता रहेको देखिएको छ ।
समाचार पोर्टल अल-मोनिटरका लागि लेख्दै आएकी किट्टल्सनलाई मंगलबार साँझ बग्दादको मध्यभागमा रहेको एक होटल नजिकैबाट अपहरण गरिएको हो । अपहरणकारीको गाडीलाई सुरक्षा बलले पिछा गर्ने क्रममा एउटा गाडी पल्टिएको र सोही क्रममा १ जना संदिग्धलाई पक्राउ गरिएको इराकी आन्तरिक मन्त्रालयले जानकारी दिएको छ ।
अमेरिकी विदेश मन्त्रालयका सहायक सचिव डिलन जोन्सनले नाम उल्लेख नगरी अमेरिकी पत्रकारको अपहरण भएको पुष्टि गरेका छन् । उनले सामाजिक सञ्जाल एक्समार्फत अमेरिकाले यसअघि नै ती व्यक्तिलाई आउन सक्ने खतराका बारेमा चेतावनी दिएको उल्लेख गर्दै उनको सुरक्षित रिहाइका लागि एफबीआईसँग समन्वय भइरहेको बताएका छन् ।
अमेरिकी अधिकारीहरूले सोमबार रातिसम्म पनि किट्टल्सनलाई पटक-पटक सम्पर्क गरेर सुरक्षा खतराको जानकारी गराएको बुझिएको छ । पक्राउ परेका व्यक्ति इरानसँग निकट मानिने कताइब हिजबुल्लाह समूहसँग सम्बन्धित रहेको अमेरिकी दाबी छ ।
किट्टल्सनका आपत्कालीन सम्पर्क व्यक्ति एवं सीएनएनका राष्ट्रिय सुरक्षा विश्लेषक एलेक्स प्लिट्सासका अनुसार अमेरिकी सरकारले उनलाई इरान समर्थित अर्धसैनिक बलबाट हुन सक्ने विशिष्ट खतराका बारेमा पहिले नै सचेत गराएको थियो । कताइब हिजबुल्लाहले महिला पत्रकारहरूलाई अपहरण गर्ने वा मार्ने योजना बनाएको र किट्टल्सनको नाम उनीहरूको सूचीमा रहेको चेतावनी दिइएको थियो ।
इराकी अधिकारीहरूले पत्रकारको रिहाइका लागि उच्च तहबाट पहल भइरहेको बताएका छन् । इराकी आन्तरिक मन्त्रालयले सटीक गुप्तचर सूचनाका आधारमा अपहरणकारीहरूको खोजी र पक्राउका लागि सघन अपरेसन चलाइरहेको उल्लेख गरेको छ ।
अल-मोनिटरले आफ्नी कन्ट्रीब्युटरको अपहरणप्रति गहिरो चिन्ता व्यक्त गर्दै उनको तत्काल र सुरक्षित रिहाइको माग गरेको छ । अमेरिकी विदेश मन्त्रालयले भने गोपनीयताको कारण देखाउँदै यस विषयमा थप विस्तृत विवरण दिन अस्वीकार गरेको छ ।
