गोरखा । राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्याङ्कन प्रतिवेदनअनुसार गोरखा जिल्लाका स्थानीय तहहरूमध्ये गोरखा नगरपालिका सबैभन्दा उत्कृष्ट ठहरिएको छ ।
आयोगले निर्धारण गरेका विभिन्न सूचकका आधारमा गरिएको मूल्याङ्कनमा गोरखा नगरपालिकाले ६९.३४ अंक प्राप्त गर्दै जिल्लामै पहिलो स्थान हासिल गरेको हो ।
आयोगले वित्तीय अनुशासन, योजना कार्यान्वयन, राजस्व संकलन, पारदर्शिता, सेवा प्रवाह, आन्तरिक नियन्त्रण प्रणाली, बेरुजु फछ्र्योट, सामाजिक समावेशीकरणलगायत १७ वटा सूचकका आधारमा स्थानीय तहहरूको मूल्याङ्कन गरेको जनाएको छ ।
सोही प्रतिवेदनअनुसार अजिरकोट गाउँपालिका जिल्लामा दोस्रो भएको छ । अजिरकोट गाउँपालिकाले ६७. ६३ प्रतिसत अंक प्राप्त गरेको छ ।
त्यस्तै गण्डकी गाउँपलिकाले ६४.०३ प्रतिसत अंक ल्याएर जिल्लामा चौथो उत्कृष्ठ पालिका बनेको छ ।
उता सहिद लखन गाउँपालिकाले ६२.५२ प्रतिसत अंक प्राप्त गरेको छ । त्यस्तै धार्चे गाउँपालिकाले ६०.३४, बारपाक सुलिकोट गाउँपालिकाले ६०.३१ प्रतिसत, आरुघाट गाउँपालिकाले ५९.५३ प्रतिसत, सिरानचोक गाउँपालिकाले ५९. ३७ प्रतिसत अंक प्राप्त गरेको आयोगले जनाएको छ ।
आयोगका अनुसार भीमसेन थापा गाउँपालिकाले ५७.३३ प्रतिसत र पालुङटार नगरपालिकाले ५१.८७ प्रतिसत अंक प्राप्त गरेको छ ।
प्रतिवेदनअनुसार उत्कृष्ट अंक प्राप्त गर्ने स्थानीय तहहरूले वित्तीय व्यवस्थापनमा सुधार, समयमै बजेट कार्यान्वयन, आन्तरिक लेखापरीक्षणको प्रभावकारी व्यवस्था तथा अनलाइन प्रणालीमार्फत पारदर्शिता प्रवद्र्धनमा उल्लेख्य प्रगति गरेका छन् ।
राष्ट्रिय प्राकृतिक स्रोत तथा वित्त आयोगले प्रत्येक वर्ष स्थानीय तहहरूको कार्यसम्पादन मूल्याङ्कन गरी वित्तीय समानीकरण अनुदान तथा प्रोत्साहन अनुदान वितरणका आधार तयार गर्दै आएको छ ।