गोरखा । महिलाहरुमा हुने पाठेघरको मुखको क्यान्सरविरुद्व प्रभावकारी मानिएको एचपीभी खोप अभियान भोलीदेखी गोरखाको सबै पालिकामा सञ्चालन हुने भएको छ ।
राष्ट्रिय खोप कार्यक्रम अन्तरर्गत भोलीदेखी गोरखा जिल्लाको स्थानिय तहमा ह्यूमन प्यापिलोमा भारइसबिरुद्व एचपीभी खोप लगाउन लागिएको प्रदेश जनस्वास्थ्य कार्यालय गोरखाका जनस्वास्थ्य निरिक्षक तथा एचपीभी खोपका फोकल पर्सन नानीबावु दानीले जानकारी दिए ।
देशैभर आजैदेखी सुरु भएको अभियान गोरखामा भने भोलीबाट मात्र सुरु गर्न लागिएको उनले बताए । यो अभियान अन्य जिल्लाहरुमा आजदेखी फागुन १५ गतेसम्म सञ्चालनमा आउने छ भने गोरखामा भने फागुन १ गतेसम्म मात्र सञ्चालन हुने निरिक्षक दानीले बताए ।
उनका अनुसार जिल्ला भित्र सञ्चालन हुने यो अभियानमा कक्षा ६ मा अध्ययनर सबै छात्रा तथा बिधालय बाहिर रहेका १० बर्ष उमेरका किशोरीहरुलाई खोप दिइने छ ।
यो पटक जिल्लाको ११ वटा स्थानिय तहले पठाएको रकर्ड अनुसार १ हजार ८८५ जना किशोरीहरुले यो खोप पाउने छ । सोही अभियानमा गत बर्ष १० हजार २२३ जना किशोरीहरुलाई खोप लगाईएको पनि जनस्वास्थ्य निरिक्षक दानीले जानकारी दिए ।
स्वास्थ्य कार्यालयकी प्रमुख सिम्रीन काफ्लेले खोप फरक फरक पालिकामा फरक फरक दिनमा सञ्चालनमा आउने पनि जानकारी दिईन ।
उनका अनुसार एचपीभी खोप सुरक्षित, प्रभावकारी र निःशुल्क भएकाले ढुक्कसंग लगाउन समेत आग्रह गरिन ।
खोप सम्वन्धी जानकारी दिन आज बिहान कार्यालयमा आयोजित छलफल कार्यक्रममा प्रमुख काफ्लेले पाठेघरको मुखको क्यान्सरविरुद्वको एचपीभी खोप प्रारम्भिक किशोरावस्थामा दिँदा प्रभावकारी हुने अध्ययनलेहरुले देखाएको पनि जानकारी दिईन ।
नेपालमा हरेक बर्ष २ हजारभन्दा बढी महिलालाई पाठेघरको मुखको ब्यान्सर हुने गरेको एक अध्ययनले देखाएको छ । महिलामा हुने क्यान्सरमध्ये पाठेघरको मुखको क्यान्सर दोस्रो मुख्य कारण रहेको र क्यान्सरबाट महिलाको ज्यान जाने गरेको छ ।
