गोरखा । प्रदेश अस्पताल गोरखामा केही महिनादेखी अबरुद्व भएको नाक, कान, घाँटी र छाला तथा मानसिक रोगको विशेषज्ञ सेवा पुनः सञ्चालनमा आउने भएको छ ।
अस्पताल बिकास समितिको बुधबार बसेको पूर्ण बैठकले अबरुद्व भएका ति सेवाहरु तत्कालै सञ्चालनमा ल्याउने निर्णय गरेको गोरखा अस्पतालका मेडिकल सुपेरिटेन्डेन्ड एवं अस्पताल बिकास समितिका सदस्य सचिव डा.सिदार्थ खनालले बताए ।
‘पहिले हामीले मासिक रुपमा सेवा दिदै आएका थियौ’ उनले भने ‘केही महिनादेखी नियमित हुन सकेको थिएन । अब फेरी सुरु गर्न लागेका हौ ।’
अस्पतालले बिगतमा नाक, कान, घाँटीको विशेषज्ञ चिकित्सक तनहुँको दुलै गौडामा रहेको अस्पतालबाट झिकाएर सेवा दिदै थियो । केही प्राविधिक समस्याका कारण बिचमा अनिमित भएपछी नयाँ समितिले ति सबै सेवा पुनः सञ्चालनमा ल्याउन लागेको अस्पताल बिकास समितिका अध्यक्ष कृण्ण ढकालले बताए ।
मेसु खनालका अनुसार सोही अस्पतालबाट बिशेषज्ञ ल्याउन नसकेको खण्डमा चितवन र पोखराका अस्पतालहरु संग समन्वय गरेर सेवा दिने गरी तयारी थालिएको छ । बिगतमा मासिक रुपमा सेवा दिदा ५० जनासम्मले सेवा लिने गरेको पनि मेसु खनालले जानकारी दिए ।
अस्पतालले दैनिक रुपमा सेवा दिदै आएको मानसिक रोगको बिशेषज्ञ चिकित्सक सरुवा भए संगै बिगत ६ महिनादेखी उक्त सेवा रोकिएको छ । उक्त सेवालाई समेत तत्कालै नियमित गर्ने गरी तयारी थालिएको पनि उनले बताए ।
त्यसका अलावा अस्पताललाई प्राप्त भएको ईन्डोस्कोपी मेशिन समेत प्रयोगमा ल्याउने गरी सेवा दिने तयारी भएको मेसु खनालले बताए ।
‘हामी संग ईन्डोस्कोपी सेवा दिन सबै सामान छन’ उनले भने ‘केही सेटअप बाँकी रहेकोले तत्कालै पुरा गरेर महिना दिनभित्रैबाट सेवा सञ्चालनमा ल्याउने छौ ।’
ईन्डोस्कोपी सेवा दिन तालिम प्राप्त चिकित्सक समेत अस्पतालमा रहेकोले महिना दिन भित्रै कोठाको सेटअप पुरा गरेर सेवा सञ्चालनमा आउने उनले दावी गरे ।
सोही समितिको बैठकले आवश्यक अन्य विशेषज्ञ चिकित्सकीय सेवाहरु दिनकोलागि दरबन्दी पुनः संरचना गरी पद पूर्ती (ओएनएम) गर्ने समेत निर्णय गरेको छ ।
