गोरखा । आगामी प्रतिनिधिसभा निर्वाचनका लागि गोरखा जिल्लाका उम्मेदवारले खर्च गर्न पाउने रकमको सीमा निर्वाचन आयोगले तोकिदिएको छ ।
आयोगको पछिल्लो निर्वाचन खर्चसम्बन्धी मापदण्डअनुसार क्षेत्र नम्बर १ का प्रतिनिधिसभा सदस्यका उम्मेदवारले अधिकतम ३३ लाख रुपैयाँसम्म खर्च गर्न पाउने भएका छन् ।
त्यस्तैगरी, क्षेत्र नम्बर २ का उम्मेदवारका लागि खर्च सीमा २९ लाख रुपैयाँ तोकिएको निर्वाचन आयोगले जनाएको छ ।
निर्वाचन आयोगले निर्वाचन खर्च पारदर्शी, समान अवसरमुखी र नियमनयोग्य बनाउन कानुन र निर्देशिका मार्फत उम्मेदवार तथा दलहरूका लागि ऊपरी सीमा तोक्ने व्यवस्था गर्दै आएको छ ।
आयोगले तोकेको यस अधिकतम खर्च सीमा भित्रै रहेर उम्मेदवारले प्रचार–प्रसार, मानव संसाधन, यातायात, सभा–सभा, प्रचार सामग्री, संस्कृतिक कार्यक्रमलगायत गतिविधि सञ्चालन गर्नुपर्ने कानुनी प्रावधान छ ।
सो सीमा ननाघ्ने, खर्चको विवरण समयमै आयोगमा पेश गर्ने र वास्तविक खर्च देखाउने दायित्व उम्मेदवार र दल दुवैको हुने व्यवस्था गरिएको छ । आयोगले पछिल्ला वर्ष खर्च मापदण्ड कडाइका साथ लागू गर्न खोजेपनि व्यवहारमा खर्च सीमा नाघ्ने, तिलमिलिएको हिसाब–किताब बुझाउने र छद्म खर्च देखिने समस्या रहेको भन्दै निगरानी संयन्त्र सुदृढ गर्ने तयारी गरिरहेको छ ।
निर्वाचन सरोकारवालाहरूले गोरखाका दुवै क्षेत्रका लागि तोकिएको खर्च सीमा पहाडी भौगोलिक अवस्था, जनसंख्या, पहुँच र प्रचार खर्चको वास्तविकतासँग केही हदसम्म मेल खाने भए पनि कडाइका साथ कार्यान्वयन गर्न सके मात्र यसको अर्थपूर्ण प्रभाव देखिने धारणा व्यक्त गरेका छन् ।
उनीहरूका अनुसार खर्च सीमा कागजमै सीमित नभई व्यवहारमा लागु गराउन सके निष्पक्ष प्रतिस्पर्धा, पैसाको दवाब घट्ने र आम नागरिकको विश्वास वृद्धि हुने अपेक्षा गरिएको छ ।