गोरखा । उत्तरी गोरखाको धार्चे गाउँपालिका–३, उहियामा निःशुल्क स्वास्थ्य शिविर सम्पन्न भएकाे छ । शिविरमा करिब २ हजार ८० जनाले सेवा लिएकाे गाउँपालिकाकाे स्वास्थ्य शाखाले जनाएकाे हाे ।
शिविर धार्चे गाउँपालिका गोरखा, प्रदेश जनस्वास्थ्य कार्यालय, गोरखा, प्रदेश अस्पताल गोरखा र प्रदेश आयुर्वेद चिकित्सालय गोरखाको संयुक्त आयोजनामा गरिएकाे हाे ।
शिविरमा नसर्ने रोग स्क्रिनिङदेखि क्षयरोग, कुष्ठरोग, दन्त उपचार सेवा, पाठेघर, मुटु, पोषण तथा मनोपरामर्शसम्बन्धी सेवा प्रदान गरिएको स्वास्थ्य शाखाका शााखाले जनाएको छ । जस अन्तरर्गत ३६१ जनाले नसर्ने रोगको ‘स्क्रिनिङ’ जाँच सेवा लिएका थिए । त्यस्तै ३४५ जनाको परीक्षण, १३८ जनाको कुष्टरोगको ‘स्क्रिनिङ’ जाँच गरिएको छ ।
शिविरमा ३७७ जनाको छातीको एक्सरे जाँच गराएकाे थियाे । जसमध्ये ६ जनामा क्षयरोग पुष्टी भएको छ भने ११ जनामा क्षयरोगको लक्षण देखिएकाले थप परीक्षणका लागि खकारको नमुना संकलन गरिएको छ ।
त्यस्तैगरी, शिविरमा २६१ जनाले दन्त परीक्षण गराएका थिए भने ६५ जना महिलाले पाठेघरको मुखको क्यान्सर जाँच गराएका थिए । तीमध्ये ४ जनामा ‘भिआइए पोजेटिभ’ पाइएको छ ।
शिविरमा ९५ जनाले मनोसामाजिक परामर्स सेवा, १५ वर्ष मुनिका २१३ जना बालबालिकाको मुटुरोगको स्क्रिनिङ सेवा, ५ वर्ष मुनिका २२५ बालबालिकाको पोषण जाँच गरिएको छ ।
त्यस्तै शिविरमा २ जना बालबालिकाको आंशिक खोप छुटको पहिचानसमेत भएको आयाेजक संस्थाले जानकारी दिएकाे छ । प्रदेश अस्पताल गोरखाका निमित्त प्रमुख डा.सिदार्थ खनाल नेतृत्वको चिकित्सकसहितको टोलीले स्वास्थ शिविरमा सेवा प्रदान गरेका थिए ।