गोरखा । गोरखाको भीमसेन थापा गाउँपालिका–७ र ८ मा पर्ने बोर्लाङ–ऐरी भञ्ज्याङ–महादेवटार सडक स्तरोन्नती हुने भएको छ ।
गण्डकी प्रदेश सरकारबाट चालु आर्थिक वर्ष २०८२-८३ मा हस्तान्तरण भएको समपुरक अनुदान अन्तर्गत सडक स्तरोन्नती काम अघि बढेको गाउँपालिकाका अध्यक्ष लोकप्रसाद बन्जराले जानकारी दिए ।
जस अन्तरर्गत गाउँपालिकाले ठेक्का सम्झौता गरेर काम अघि बढाएको उनको भनाई छ । सडक स्तरोन्नतीका लागि गाउँपालिकाले कोटकाली बिल्डर्स एण्ड मेटेरियल्स सप्लायर्स प्रालिसँग ७३ लाख २० हजार ७५३ रुपैयाँ ४२ पैसा बराबरको ठेक्का सम्झौता गरेको गाउँपालिकाले जानकारी दिएकाे छ ।
सम्झौतामा उक्त खण्डमा सडक स्तरोन्नति, आवश्यक ग्राभेलिङ, ढलान, ढल व्यवस्थापन तथा अन्य पूर्वाधार सम्बन्धी काम हुने उल्लेख गरिएको छ । सम्झौताअनुसार ठेकेदारले तोकिएको मापदण्ड, प्राविधिक नक्सा र कार्ययोजना बमोजिम समयसीमा भित्र काम सम्पन्न गर्नुपर्नेछ ।
भिमसेनथापा गाउँपालिकाले ग्रामीण सडकखण्डमा बाह्रै महिना यातायात पहुँच सुधार, स्थानीय बजारसँग जोड्ने पूर्वाधार विकासको कामलाई जोड दिदै आएको छ । सम्झौता अनुसार गुणस्तरीय ढंगबाट तोकिएकै समयमा योजना सम्पन्न गर्ने ठेकेदार कम्पनीले जनाएको छ ।