गाेरखा । सञ्चार तथा सूचना प्रविधिमन्त्री जगदीश खरेलले देश परिवर्तनको दिशामा अघि बढिरहेको बताएका छन् । सञ्चार तथा सञ्चार प्रविधि मन्त्रालय अन्तरर्गत हुलाक सेवा विभागको आयोजनामा गोरखा हुलाक कार्यालयलाई ‘स्मार्ट हुलाक’ घोषणा तथा शुभारम्भ गर्न आयोजित कार्यक्रमलाई सम्बोधन गर्नुहुँदै उनले देशलाई विकास र सम्बृद्धि खोजीरहेको बताएका हुन् ।
सवैमा भावनात्मक एकता र परिवर्तनको सोचसहित विकास र समृद्धिको बाटोमा देशलाई अघि बढाउनुपर्नेमा उनले जोडदिए । सञ्चार प्रविधिमन्त्री खरेलले देशमा फागुन २१ गते चुनाव हुन्छ की हुँदैन भन्ने बहसको अन्त्य भइसकेको भन्दै तोकिकै समयमा शान्तिपूर्ण र भयरहित निर्वाचन सम्पन्न हुने बताए ।
आगामी निर्वाचन शान्तिपूर्ण ढंगबाट सम्पन्न गर्ने गरी सवै भाग लिने वातवारण बनाउनुपर्ने भन्दै उनले निर्वाचनको सम्पूर्ण वातावरण तयार भइसकेको उल्लेख गरे । उनले सुरक्षाकर्मीको मनोबल कमजोर रहेको भन्ने प्रश्न यदाकदा उठ्ने गरेको भन्दै नेपालका निकायले अहिलेको भन्दा निक्कै झनै जटिल परिस्थितिमा पनि आफ्नो जिम्मेवारी सहज ढंगबाट पुरा गर्दै आएको स्मरण गराउदै सुरक्षाकर्मीले उच्च मनोवलका साथ काम गरिरहेको बताए ।
सञ्चार मन्त्री खरेलले गोरखा हुलाक कार्यालयलाई ‘स्मार्ट हुलाक’ घोषणा गरेसंगै अव नेपालको हुलाक सेवालाई स्मार्ट बनाउने दिशामा मुुलकु अघि बढेको उल्लेख गरे । मन्त्री खरेलले नीतिगत स्पस्टता र व्यवस्थापनसहित काम गर्न सके अवको ५ बर्ष भित्रमा हुलाकलाई ठूलो राजस्व आम्दानी गर्ने कार्यालयको रुपमा विकास गर्न सकिने स्पस्ट पारे ।
कार्यक्रमलाई सम्बोधन गर्नुहुँदै सञ्चार तथा सूचना प्रविधि मन्त्रालयकी सचिव राधिका अर्यालले गोरखा हुलाक कार्यालयलाई देशकै पहिलो स्मार्ट हुलाकका रूपमा गोरखा हुलाक घोषणा हुनु गौरवको विषय भएको बताइन ।
जनताको घरदैलोसम्म पुग्ने सेवा हुलाक भएकाले सबै सरकारी कार्यालयलाई हुलाकसँग आबद्ध गर्नुपर्ने आवश्यकता औंल्याउँदै उनले दुर्गम क्षेत्रमा टेलिफोन तथा सञ्चार सेवा विस्तारका लागि पहल गरिने प्रतिबद्धता व्यक्त गरिन ।
गोरखाका प्रमुख जिल्ला अधिकारी तुलसीबहादुर श्रेष्ठले हुलाकको कार्यक्षेत्र अझ फराकिलो बनाउँदै सेवा व्यापक प्रचार गर्नुपर्ने बताए ।
जिल्ला समन्वय समिति गोरखाकी उप-प्रमुख लिला परियारले हुलाक सेवालाई प्रभावकारी बनाउन सचेतना अभिवृद्धि आवश्यक रहेको धारणा राखिन् ।
कार्यक्रममा जिल्ला हुलाक अधिकृत विनोदप्रसाद गैरेले १४७ वर्ष पुरानो इतिहास बोकेको हुलाक सेवाले विकसित र विशाल सेवा प्रणालीको सपना देखेको बताए । गोरखा जिल्लामा ११ वटा हुलाक कार्यालय र ६५ जना कर्मचारी कार्यरत रहेको जानकारी दिँदै उनले हुलाक नै जनताको सेवा बोकेर घरदैलोमा पुग्ने एक मात्र कार्यालय भएको उल्लेख गरे ।
अनलाइन ट्र्याकिङ प्रणालीमार्फत सेवाग्राहीले आफ्ना सामग्रीको अवस्थाबारे जानकारी पाउन सक्नु हुलाकको बलियो पक्ष भएको उनको भनाइ छ ।
हाल आफ्नै सवारी साधनको अभावका कारण समस्या भए पनि सामग्री ढुवानीलाई प्राथमिकता दिन थालिएको जानकारी दिँदै गैरेले जिल्लाभित्रका सबै हल्कारालाई डिजिटल सेवामा दक्ष बनाइएको, सबै पालिकामा ट्र्याकिङ प्रणाली लागू गरिएको तथा हल्कारालाई ड्राइभिङ तालिमसमेत दिइएको बताए ।
पीआईटीएस प्रणाली युट्युबमार्फत सञ्चालन भइरहेको र २५ प्रतिशत राजस्व वृद्धि लक्ष्य लिइएको उनकाे भनाइ छ । साथै, गन्द्रुक र मासको दालजस्ता स्थानीय उत्पादन पठाउन कानुनी व्यवस्था आवश्यक रहेकोमा उनले जोड दिए ।
