गोरखा । गोरखाकाे १ युवककाे राजधानीमा चक्कु प्रहारबाट हत्या भएको छ । जिल्लाको सिरानचोक गाउँपालिका–७, क्होला आरुबोट स्थायी घर भई हाल काठमाडौंमा बसोबास गर्दै आएका २१ वर्षीय बबिन गुरुङको चक्कु प्रहारबाट हत्या भएको हाे ।
काठमाडौं बसपार्क नजिकै एक दोहोरी साँझबाट राति फर्किने क्रममा मंगलबार साँझ गुरुङलाई धारिलो हतियार प्रयोग गरी आक्रमण भएको प्रहरीले पुष्टी गरेकाे छ ।
अज्ञात समूहले गुरुङमाथि मुटुमा चक्कु प्रहारसहित कुटपिट गरेका थिए । मंगलबार राती चक्कु प्रहार र कुटपिटबाट गम्भीर घाइते भएका गुरुङलाई तत्काल केएमसी अस्पताल भर्ना गरिएकाे थियाे । उनकाे उपचारकै क्रममा बुधबार दिउँसो १२ बजेर १० मिनेटमा ज्यान गएको अस्पताल स्रोतले पुष्टि गरेको छ ।
घटनामा संलग्न भएको आंशकाममा प्रहरीले ३ जनालाई पक्राउ गरेको छ । प्रहरीले घटनाको प्रारम्भिक अनुसन्धान अघि बढाइसकेको र घटनामा संलग्न अन्य व्यक्तिहरू भए+नभएको विषयमा थप छानबिन भइरहेको जनाएको छ ।
घटनाप्रति सिरानचोक गाउँपालिकावासी, बुद्धिजीवी, समाजसेवी तथा विभिन्न संघ–संस्थाका प्रतिनिधिहरूले गहिरो दुःख व्यक्त गर्दै सत्यतथ्य छानबिन गरी पीडित परिवारलाई न्याय दिलाउन माग गरेका छन् ।
स्थानीय रोहित गुरुङका अनुसार बबिन परिवारका एक्ला छोरा थिए । उनको हत्याले सिंगो गाउँ नै शोकमा डुवेको गुरुङले बताए । मृतकका आफन्तले दोषीलाई कानुनी दायरामा ल्याई कडाभन्दा कडा सजाय दिन माग गरेका छन् ।
यस घटनाले राजधानी क्षेत्रमा रातिको समयमा हुने आपराधिक गतिविधिप्रति पुनः प्रश्न उठाएको छ ।
