गोरखा । मनास्लु संरक्षण क्षेत्र आयोजना (एमक्याप) ले उत्तरी गोरखाको चुमनुब्री गाउँपालिका–३, फिलिममा वन डढेलो सम्बन्धी विशेष सचेतनामूलक अभिमुखीकरण कार्यक्रम सम्पन्न गरेको छ ।
पछिल्लो समय यस क्षेत्रमा बढ्दो वन डढेलोका घटना र त्यसले समुदाय तथा वातावरणमा पारिरहेको दुष्प्रभावलाई मध्यनजर गर्दै एमक्यापले सचेतनामूलक कार्यक्रम सञ्चालन गरेको हो ।
गाउँपालिका-३ काे विभिन्न स्थानमा गोठ बनाएर बस्दै आएका गोठाला समूहका प्रतिनिधिहरुलाई लक्षित गरी कार्यक्रम संचालन गरिएको एमक्याप गोरखाका प्रमुख सन्तोष शेरचनले बताए ।
कार्यक्रममा वन डढेलोका कारण, जोखिम, क्षति, रोकथामका उपाय, स्थानीयको भूमिकादेखि डढेलो नियन्त्रणका व्यावहारिक सीपसम्मका विषयमा गोठालाहरुलाई अभिमुखीकरण प्रदान गरिएको उनले जानकारी दिए ।
सचेतनामूलक अभिमुखीकरण कार्यक्रममा चुमनुब्री गाउँपालिकाकाकी उपाध्यक्ष लक्ष्मी गुरुङले स्थानीय स्तरमै डढेलो नियन्त्रण र रोकथामका गतिविधि सशक्त बनाउन समुदायकै अग्रसरता अपरिहार्य रहेको बताइन । स्थानीय भाषा र आफ्नै शैलीमा प्रस्तुत गरिएको कार्यक्रमले समुदायमा अझ प्रभावशाली ढंगले सन्देश पुर्याएको उनको भनाई थियो ।
कार्यक्रममा चुमनुब्री गाउँपालिका-३ का अध्यक्ष रामकुमार गुरुङ, पाङसिङ गुम्बाका प्रमुख लामा कृष्ण लामालगायतको उपस्थिती रहेको थियो ।
कार्यक्रममा सहभागीहरुले वन तथा प्राकृतिक स्रोत–साधन संरक्षणमा स्थानीय समुदायको नेतृत्व र सामूहिक प्रयास आवश्यक रहेकोमा जोड दिएका थिए ।
सहभागीहरूले पनि हालै भएका डढेलोका घटनाले चरन क्षेत्रदेखि बस्ती र वन्यजन्तुसम्ममा पुर्याएको हानीबारे आफ्ना अनुभवहरु प्रस्तुत गरेका थिए ।
त्यस्तै कार्यक्रमका डढेलो नलाग्ने तरिका, जोखिम कम गर्ने उपाय, नियन्त्रणका प्राथमिक विधि तथा साधनको सही प्रयोगबारे सहभागीहरुलाई जानकारी गराइएको आयोजक एमक्याप गोरखाले जनाएको छ ।
कार्यक्रममा सहभागीहरुले प्राप्त ज्ञानलाई आफ्ना गोठ, चरन क्षेत्र तथा बस्ती वरपर व्यवहारिक रूपमा लागू गर्ने प्रतिबद्धता जनाएका छन् । कार्यक्रम गाउँपालिकाकी उपाध्यक्ष लक्ष्मी गुरुङको प्रमुख आतिथ्यतामा सम्पन्न भएको हो ।
