गोरखा । सहिद लखन गाउँपालिकाले आज पालिका भित्र सार्वजनिक विदा दिएको छ । गाउँपालिकाको वडा नम्बर १ र २ मा पर्ने नेपालकै प्रसिद्ध धार्मिकस्थलको रुपमा चिनिने मनकामनाको मन्दिरमा गुठी पञ्चमीका अवसरमा विशेष पूजा र मेला लाग्ने भएकाले पालिका भित्र सार्वजनिक विदा दिएको हाे ।
गाउँपालिकाका प्रमुख प्रशासकीय अधिकृत बाबुराम मगरका अनुसार गाउँ कार्यपालिकाको बैठकले गुठी पञ्चमीमा पालिका भित्र विदा दिने निर्णय गरेको हाे । सार्वजनिक विदाका दिन पालिकामातहतका सबै सरकारी कार्यालयहरु र विद्यालय बन्द रहनेछन् ।
मनकामना मन्दिरको प्राङगढमा गुठी पञ्चमीका दिन ठूलो मेला लाग्ने गर्दछ । उक्त मेलामा देशकाे बिभिन्न स्थानबाट ठूलो संख्यामा भक्तजनहरु मनकामना माताको दर्शन गर्न, पूजाआजा र मेला हेर्न आउने गर्दछन् ।
ऐतिहासिक र धार्मिक गन्तव्यका रुपमा परिचित मनकामना मन्दिरमा यसदिन भजनकिर्तन र गुठीका परम्परागत विधिहरुसमेत सम्पन्न गरिन्छ । मनकामना मन्दिरको धार्मिक र सांस्कृतिक महत्वलाई संरक्षण र प्रवद्र्धन गर्ने उद्देश्यका साथ गाउँपालिकाले हरेक बर्ष पालिका भित्र गुठी पञ्चमीका दिन सार्वजनिक विदा दिदै आएको छ ।