गोरखा । नयाँ बर्षको पूर्व सन्ध्यामा गोरखा सदरमुकाममा आजदेखी खाना महोत्सव हुदै छ । गोरखा होटल संघको आयोजनामा ‘दोस्रो रैथाने खाना महोत्सव २०८१’ सुरु हुन लागेको हो ।
गोरखा नगरपालिका र नेपाल पर्यटन बोर्ड प्रवद्र्वक भएको उक्त महोत्सव २०८१ चैत्र २६ गतेदेखी २०८२ बैशाख २ गतेसम्म सञ्चालनमा आउने गोरखा होटल ब्यवसायी संघका सचिव सुमन श्रेष्ठले जानकारी दिए ।
महोत्सवको सबै तयारी पुरा भएकाे सचिव श्रेष्ठले बताए । उनका अनुसार आज हुने उद्घाटन कार्यक्रममा प्रमुख अतिथीकाे रुपमा नेकपा माओबादीका बरिष्ठ उपाध्यक्ष एवं पूर्व उप-प्रधानमन्त्रि नारायणकाजी श्रेष्ठ रहेका छन् ।
संघकाे कार्यतालिका अनुसार बिहान खेलकुद मैदानबाट सुरु हुने झाँकी रहितकाे र्यालीले गाेरखा बजारकाे परिक्रममा गरेर महाेत्सव स्थलमा आउने छ । त्यस बाहेक पनि भिन्न १३ स्थानमा बिभिन्न जातजातीकाे झाँकीहरु बिहानैदेखी प्रर्दशन गरीने भएकाे छ ।
अंग्रेजी नयाँ बर्षमा पोखरा गए जस्तै नेपाली नयाँ बर्षमा आन्तरिक तथा बाह्य पर्यटकलाई गोरखा ल्याउने उद्वेश्य सहित महोत्सवको आयोजना गरीएको आयाेजकले जानकारी दिए ।
गोरखा नगरपालिका–६ हरमटारीको खेलकुद मैदानमा हुने उक्त महोत्सवमा गोरखाको रैथाने खाना (जाती विशेष अनुसार) सहितको जिल्ला भित्र रहेको विभिन्न जातीको धर्म तथा भेषभूषाको पहिचान दिने, गोरखाको बिरता र एकता झल्काउने कार्यक्रमका साथै कृषि प्रदर्शन र मनोरञ्जनात्मक कार्यक्रमहरुको आयोजना गरीएको छ ।
८ दिनसम्म चल्ने महोत्सवमा १४० वटा स्टल हुने र ४३ वटा स्टल रैथाने खाना राख्नकोलागी निःशुल्क उपलब्ध गराइने पनि आयोजकले जनाएको छ ।
महोत्सव अवधिभर करिब ३७ लाख खर्च हुने अनुमान गरेको संघले पहिलो महोत्सव २०८० सालको चैत्र मा सडक खाना महोत्सवको रुपमा मनाएको थियो ।
