गोरखा । गोरखा संग्रालयको अबलोकन गर्नेको संख्या यो बर्ष घटेको छ । अघिल्लो आर्थिक बर्षमा करिब १ लाख २४ हजारको हाराहारीले अवलोकन गरेको संग्रालय यो बर्ष करिब १ लाख २० हजार मानिसले मात्र अवलोकन गरेको संग्रालय प्रशासनले जानाकारी दिएको हो ।
गोरखा दरर्बार संग्रालय प्रमुख जयनारायण कार्कीका अनुसार आर्थिक बर्ष २०७९–०८० मा १ लाख २३ हजार ७३१ जनाले अबलोकन गरेको आर्थिक बर्ष ०८०–०८१ मा १ लाख १९ हजार १८० जनाले मात्र अवलोकन गरेको छ ।
कार्यालयले उपलब्ध गराएको तथ्यांक अनुसार संख्यात्मक हिसाबले अवलोकन कर्ता घटेता पनि राजश्व आम्दानी भने बढेको देखिएको छ । आव २०७९–०८० मा २६ लाख ७७ हजार ४७५ रुपैयाँ राजश्व आम्दानी भएकोमा आव २०८०–०८१ भने भने २७ लाख ८५ हजार ४९१ रुपैयाँ पुगेको छ ।
संग्रालय प्रमुख कार्कीका अनुसार आव २०८०–०८१ मा अघिल्लो बर्षको तुलनामा ४ हजार ५५१ जनाले कमी आएको छ । उपलब्ध तथ्यांक अनुसार ३५ हजार ३५६ जना बिद्यार्थी, ८२ हजार १४४ जना नेपाली, १५९ जना सार्क राष्ट्रका र १ हजार ५२८ जना बिदेशीले अवलोकन गरेको देखिन्छ ।
०६५ साल जेठ १९ गते विधिवत रुपमा खुल्ला गरिएको संग्रालयमा हालसम्म १० लाख ७५ हजार ८९९ जनाले अवलोकन गरेको पनि प्रमुख कार्कीले बताए ।
संग्रालयको अग्र भागमा भने तात्कालिन राजा रणबहादुर शाहको पालामा बिस १८५० ताका बनेको २ वटा तोप राखिएको छ । संग्रालय अवलोकन गर्न आउने मध्ये अधिकांशले तोपको बिचमा बसेर तस्बिर खिचाउने गर्दछन् ।
कुल ६८ रोपनी क्षेत्रफलमा फैलिएको यो संग्रालय परिषरमा करिब ३०० प्रजातिका रुख बिरुवाहरु देख्न सकिन्छ ।
संग्रालय भित्र तात्कालिन गोरखा राज्यको महत्व झल्किने ऐतिहासीक, पुरातात्विक, आर्थिक तथा संस्कृती झल्कने खालका बहुमुल्य सामाग्रीहरु राखिएको छ ।
