गोरखा । गण्डकी प्रदेशका मुख्यमन्त्री सुरेन्द्रराज पाण्डेले प्रदेशलाई जलस्रोत, कृषि, पर्यटन लगायतका क्षेत्र मार्फत आत्मानिर्भर प्रदेशको रुपमा स्थापित गराउने योजनामा रहेको बताए ।
गृह जिल्ला गोरखा आएन उनले पत्रकारहरु संग कुरा गर्दै गण्डकी प्रदेश भित्र आर्थिक आयआर्जनका प्रचुर सम्भावना रहेकाले योजनाबद्ध ढंगले प्रदेशलाई आत्मानिर्भर बनाउन लागि परेको बताएका हुन् ।
‘मुख्यमन्त्री पाण्डेले प्रदेशले उर्जा क्षेत्रको बिकास मार्फत आर्थिक सम्बृद्धि हासिलका लागि पनि राम्रो सम्भावना बोकेको भन्दै बुढीगण्डकीदेखि लिएर कालीगण्डकीसम्मका जलक्षेत्र गण्डकी प्रदेशमा पर्ने भएका कारण बिद्युत उत्पादनबाटै पनि प्रदेशले आम्दानी लिदा आत्मनिर्भर हुने बताए ।
उनले उर्जाको क्षेत्रमा राज्यले लगानी गर्नसक्ने अबस्थामा राज्य एक्लै र नसक्ने अवस्थामा नीजि क्षेत्रसंग सहकार्य गरेरै भएपनि लामो समयसम्म राज्यलाई आम्दानी गर्नसक्ने गरी काम गर्नुपर्नेमा जोड दिए । मुख्यमन्त्री पाण्डेले नवलपुरको धौवाजीमा रहेको फलाम खानीमा लगानी गर्नुपर्छ भन्ने सोचमा प्रदेश सरकार रहेको पनि जानकारी दिए ।
पर्यटन क्षेत्रबाट गण्डकी प्रदेशले राम्रो आयस्रोत लिन सक्ने भन्दै मुख्यमन्त्री पाण्डेले बढीभन्दा बढी पयर्टक भित्र्याएर प्रदेश सरकारको आयस्रोत बृद्धि गर्दै आत्मानिर्भर प्रदेश बनाउने योजनामा प्रदेश सरकार रहेको पनि बताए ।
मुख्यमन्त्री भएदेखी गाँजा खेती र घरेलु मदिराका बिषयमा चासो राख्दै आएका उनले गाँजा खेती तथा घरेलु मदिरलाई ब्रान्डिङ गरेर पनि प्रदेश सरकारले प्रसस्त आम्दानी गर्न सक्ने अबस्था भएको आवश्यक अध्ययन गरी त्यसलाई पनि अघि बढाउने पनि उनले बताए ।
फरक प्रसंगमा मुख्यमन्त्री पाण्डेले संघिय लोकतान्त्रिक गणतन्त्र नेपाली जनताको चाहना अनुसार आएको व्यवस्था भएकाले कसैले नचाहादैमा गणतन्त्र नउल्टिने भन्दै जनताले रगत र पसिना बगाएर ल्याएको गणतन्त्र कुनै व्यक्तिले चाहिदैन भन्दैमा त्यसको अर्थ नहुने धारण ब्यत्त गरे ।
‘संघिय लोकतान्त्रिक गणतन्त्र लहडमा आएको होइन, मुख्यमन्त्री पाण्डेले भने, ‘अहिले जसले गणतन्त्र चाहिदैन भनिरहेका छन् उनीहरुलाई गणतन्त्र कसरी आयो भन्ने नै थाहा छैन ।’ उनले अहिलेको व्यवस्थालाई स्विकार गरेर संविधानलाई मानेर संसदमा पुगेका व्यक्तिहरुले गणतन्त्रको बिरुद्धमा बोल्नु नजायज भएको तर्क समेत गरे ।
