गोरखा । जिल्लामा स्वास्थ्य बिमा गराउनेहरुको संख्या करिब ८९ हजार पुगेका छन् । स्वास्थ्य बिमाको महत्व बुझन थाले पछि आज (बुधबार)सम्म जिल्ला भित्रका ८८ हजार ७१६ जनाले स्वास्थ्य बिमा गराएका हुन् । गत आवमा गोरखा जिल्लामा ६२ हजार ३२७ जनाले स्वाथ्य बिमा गराएका थिए ।
स्वास्थ्य बिमा बोर्ड गोरखाको कार्यालयले दिएको जानकारी अनुसार जिल्लामा सबैभन्दा बढी स्वास्थ्य बिमा गराउने गोरखा नगरपालिकामा बसोबास गर्ने रहेका छन् । गोरखा नगरपालिकामा मात्रै २१ हजार ७१८ जनाले बीमा गराएको स्वास्थ्य बीमा बोर्ड गोरखाले जनाएको छ ।
जिल्लाको १८ हजार ७७ घर परिवार सामेल भएको यो कार्यक्रममा दोस्रो स्थानमा पालुङटार नगरपालिकाबाट सहभागी भएका छन् । पालुङटार नगरपालिकाबाट १६ हजार १५१ जनाले स्वास्थ्य बिमा गराएको कार्यालयले उपलब्ध गराएको रेकर्डमा देखिन्छ ।
त्यस्तै गरी, सिरानचोक गाऊँपालिकाबाट ९ हजार ९४२ जना, आरुघाट गाउँपालिकाबाट ८ हजार ३३४ जना, शहिद लखन गाँउपालिकाबाट ८ हजार ७४ जना र भिमसेन थापा गाँउपालिकाबाट ७ हजार ८४८ जनाले स्वास्थ्य बिमा गराएको कार्यालय प्रमुख बिशाल लौडारीले जानकारी दिए ।
उता अजिरकोट गाँउपालिकाबाट २ हजार ४१३ जना, बारपाक सुलिकोट गाँउपालिकाबाट ६ हजार, गण्डकी गाँउपालिकाबाट ५ हजार ३१० जना, धार्चे गाँउपालिकाबाट १ हजार ८९३ जना र चुमनुब्री गाँउपालिकाबाट ७७४ जनाले स्वास्थ्य बिमा गराएको पनि कार्यायले जानकारी दिएको छ ।
बीमा कार्यक्रममा सहभागी भएका मध्ये १ हजार ९३३ जना अति गरीव, १५ हजार ९०४ जना जेष्ठ नागरिक, ५९८ जना ‘क’ वर्गको अपाङता भएका र ३४३ जना एचआइभी संक्रमितको निशुल्क बिमा गरिएको छ ।
त्यस बाहेक पनि ३४१ जना महिला स्वास्थ्य स्वयमसेविकालाई ५० प्रतिशत छुटमा स्वास्थ्य बीमा कार्यक्रममा आवद्ध गरिएको छ ।
सरकारी निती अनुसार स्वास्थ्य बिमाको लागि ५ जना सदस्य भएको परिवारले वर्षको ३ हजार ५०० रुपैयाँ तिरेपछि वर्षभरीमा प्रति ब्यक्ति १ लाख रुपैया बराबरको स्वास्थ्य उपचार निशुल्क पाउने गर्दछ । तर ५ जनाभन्दा बढी सदस्य भएको परिवारलाई भने १ व्यक्ति बराबर ७०० रुपैयाँ थप गरेर बिमा कार्यक्रममा सहभागी गराउने गरिएको कार्यालयले जनाएको छ ।
सामाजिक स्वास्थ्य सुरक्षा कार्यक्रम अन्तर्गत बीमा गर्ने व्यक्तिले तोकिएको कुनै पनि अस्पतालबाट ओपीडी सेवा, इमर्जेन्सी, ल्याब उपचार, सामान्य अपरेसन लगायतका उपचारमा सेवा लिन पाउने छन् ।
गोरखा जिल्लाको हकमा भने सदरमुकाममा रहेको गोरखा अस्पताल, पालुङटार नगरपालिकामा रहेको आँपपिपल अस्पताल, शहिद लखन गाँउपालिकामा रहेको मकैसिंङ प्राथमिक स्वास्थ्य केन्द्र, सिरानचोक गाँउपालिकामा रहेको जौवारी प्राथमिक स्वास्थ्य केन्द्र र आरुघाट गाँउपालिकामा रहेको आरुघाट प्राथमिक स्वास्थ्य केन्द्रलाई स्वास्थ्य बीमा बोर्डले उपचारका लागि सूचीकृत गरेको छ ।
गोरखा जिल्लामा २०७४ सालको असार महिनाबाट स्वास्थ्य बीमा कार्यक्रम लागुृ भएको हो ।
