गोरखा । गोरखाको अधिकांश जमिनमा अम्लिएपनाको चपेटामा रहेको पुष्टी भएको छ । कृषि ज्ञानकेन्द्र गोरखाले जिल्लाको बिभिन्न ३ वटा स्थानीय तहमा गरेको माटो परीक्षणका क्रममा उक्त कुराको पुष्टी भएको हो ।
कार्यालयले केही साता अगाडी ३ वटा स्थानिय तहको माटो परिक्षण गर्दा ५४.२२ प्रतिसत स्थानको माटोमा अम्लियपनाको मात्रा बढी भएको रिर्पोट प्राप्त भएको कृषि ज्ञान केन्द्र गोरखाका प्रमुख परशुराम अधिकारीले जानकारी दिए ।
कार्यालयले भीमसेन थापा गाउँपालिका, गोरखा नगरपालिका र पालुङटार नगरपालिकामा गरेको माटो परिक्षणका क्रममा किसानको जमिनमा अम्लिएपनाको मात्रा अत्याधिक रहेको पाईएको थियो । ति पालिकाहरुमा कार्यालयले मोवाइल भ्यानमा उपकरण र किटबक्स बिधिबाट २८४ स्थानको माटोको नमुना परीक्षण गरेको थियो ।
‘कृषियोग्य जमिनको माटोको अबस्था जाँच गर्दा धेरैजसो स्थानका माटोमा अम्लियपनको मात्रा अधिक रहेको भन्दै प्रमुख अधिकारीले त्यस्तो देखिएको माटोमा उपचारका लागि कृषि चुन र गोबर मल हाल्न सुझाव दिएको बताए ।
माटोमा ६ देखि ७ पिएचसम्म अम्लीयपन रहे त्यसलाई राम्रो मानिन्छ तर ६ पिएच भन्दामुनि र ७ पिएच भन्दामाथि भएको अम्लीयपनालाई भने माटो खराब मानिन्छ । अम्लीयपन भएको माटोमा जुनसुकै खेती गर्दापनि जति उत्पादन राम्रो नहुने भएका कारण माटोको उपचार एक मात्र बिकल्प हो ।
कार्यालयले उपलब्ध गराएको तथ्यांक अनुसार गोरखा नगरपालिकामा १२६, भीमसेन थापा गाउँपालिकाको ११५ र पालुङटार नगरपालिकामा ४३ स्थानको माटो परीक्षण गरिएको थियो ।
त्यसमध्ये १५४ स्थानको माटोमा अम्लीयपना बढी भएको पाइएको र १३० स्थानको माटो तटस्थ रहेको पाइएको कार्यालयले जानकारी दिएको छ ।
परीक्षणका क्रममा ३३ दशमलव ८ प्रतिसत स्थानको माटोमा नाइट्रोजनको मात्रा कम भएको, ३६ दशमलव २ प्रतिसत स्थानको माटो मध्यम रहेको र ३० प्रतिसत स्थानको माटोमा नाइट्रोजनको मात्रा बढी रहेको पाइएको तथ्यांकमा उल्लेख गरिएको छ ।
त्यस्तै गरी, ३२ दशमलव ८ प्रतिशत स्थानको माटोमा फस्फोरसको मात्रा कम, २५ प्रतिशत स्थानको माटोमा मध्यम र ४२ दशमलव २ प्रतिशत स्थानको माटोमा फस्फोरसको मात्रा अधिक रहेको पाइएको पनि कार्यालयले उपलब्ध गराएको तथ्यांकमा उल्लेख गरिएको छ ।
