गोरखा । गोरखाको पालुङटारमा भएको तेस्रो लिगलिगे साईकल दौड प्रतियोगीताको उपाधी नेपाली सेनाका हिमाल टमाटाले हात पारेका छन् । ‘मेन इलिट’ तर्फको ५३ किलोमिटर निर्धारित दुरी २ घण्टा २४ मिनेट २७ सेकेण्डमा पार गर्दै उनले उपाधी जितेका हुन् । उनले ७५ हजार नगद पुरस्कारको साथमा मेडल र प्रमाणपत्र पाएका छन् ।
निर्धारित दुरी २ घण्टा २४ मिनेट ४१ सेकेण्डमा पार गर्दै काभ्रेका अच्युतकृष्ण खरेल दोस्रो बनेका छन् । उनलाई ५० हजार नगद पुरस्कारको साथमा मेडल र प्रमाणपत्र प्रदान गरिएको आयोजक लिगलिग भिलेज स्पोर्टसका सचिव प्रमिला रानाले जानकारी दिइन ।
प्रतियोगीतामा काठमाण्डौका कुमार तामाङ तेस्रो बने । उनले निर्धारित दुरी २ घण्टा २४ मिनेट ४६ सेकेण्डमा पार गरेका थिए । उनले ३० हजार नगद पुरस्कार पाएका छन् । त्यस्तै शसस्त्र प्रहरीका लक्ष्मण मल्ल चौथो र नेपाली सेनाका मान बहादुर थापा मगर पाँचौ भएका छन् । उनीहरुले क्रमश १५ हजार र ७ हजार पाँच सय नगद पुरस्कार सहित मेडल र प्रमाणपत्र पाएका छन् ।
त्यस्तै ‘मेन मास्टर’ तर्फ हर्क लामा पहिलो बने । उनले निर्धारित दुरी २ घण्टा ३२ मिनेट ४ सेकेण्डमा पार गरेका हुन् । पहिलो बनेका लामाले १५ हजार नगद पुरस्कार पाएका छन् । प्रतियोगीतामा बिकास महर्जन दोस्रो बनेका छन् । निर्धारित दुरी २ घण्टा ४९ मिनेट ५५ सेकेण्डमा पार गरेका उनले दश हजार नगद पुरस्कार पाए । निर्धारित दुरी २ घण्टा ५२ मिनेट २१ सेकेण्डमा पार गर्दै देव बहादुर वोहरा तेस्रो बने । उनले ५ हजार नगद पुरस्कार पाएको संजिव रानाले बताए । प्रतियोगीताका बिजेता खेलाडीहरुलाई गण्डकी प्रदेश सांसद सुरेन्द्रराज पाण्डेले पुरस्कार वितरण गरेका हुन् । प्रतियोगीतामा दुई बिदेशी नागरिक सहित कुल ३९ जनाको सहभागीता रहेको थियो ।
लिगलिगकोटबाट सुरु भएको साईकल दौड आँपपिपल भञ्ज्याङ, हर्मिभञ्ज्याङ, आँपपिपल अस्पताल, भण्डारथोक, लमजुङ गरमवेशी, ठूलो बगैचा, चेपेघाट, पालुङटार हवाईग्राउण्ड, तालपोखरी, राधाकृष्ण मन्दिर, बाह्रपिर्के, लुइँटेल बयाडाँडा हुदै पुनः लिगलिगकोटमा आएर टुङ्गिएको थियो । पर्यटन प्रवद्र्धन गर्ने उदेश्यले प्रतियोगीता गरिएको लिगलिग भिलेज स्पोर्टसकी सचिव प्रमिला रानाले बताइन् ।