गोरखा । नेपाल कम्यूनिष्ट पार्टी (माओवादी केन्द्र) को गण्डकी प्रदेशले विभिन्न विभागमा गोरखाका ४ जनालाई प्रमुखमा चयन गरेको छ । चयन भएका मध्ये पत्रकार दिपक श्रेष्ठ सहित ४ जनाले विभागको प्रमुख पदमा जिम्मेवारी पाएको हो ।
माओवादी केन्द्रको प्रदेश कमिटीले हालै ३० विभागमा जिम्मेवारी दिदा पत्रकार श्रेष्ठले प्रचार प्रशार विभागको प्रमुखको जिम्मेवारी पाएको हो । श्रेष्ठले हालै सम्पन्न स्थानिय तथा प्रदेश र संघिय निर्वाचनमा देखाएको क्रियाशिलतालाई सम्मान गर्दै प्रमुखको जिम्मेवारी दिइएको प्रदेश कमिटीका एक नेताले जानकारी दिए ।
श्रेष्ठ माओावादी समर्थित प्रेस सेन्टरको केन्द्रिय कमिटीका उपमहासचिव हुन भने जिल्ला सदरमुकाममा रहेको रेडियो मनास्लुको स्टेशन म्यानेजर समेत जिम्मेवारी सल्हालिरहेका छन् । श्रेष्ठ राष्ट्रिय समाचार समितिमा संलग्न छन् ।
गोरखा जिल्लाबाट जिम्मेवारी पाउने मध्ये माओवादीका नेता जगन्नाथ खनाल संगठन विभागको प्रमुखमा चयन भएका छन् । खनालको समितिमा गोरखाकै गण्डकी गाउँपालिकाका अध्यक्ष दिपक तिमिल्सिनालाई पनि सदस्यमा चयन गरीएको प्रदेश कमिटीले जानकारी दिएको छ ।
यता शिक्षा तथा मानवस्रोत विभागको प्रमुखमा गोरखाकै ध्रुव भट्टलाई जिम्मेवारी प्रदान गरिएको छ । भट्ट यसअघि एकीकृत अखिल नेपाल शिक्षक संगठनका जिल्ला अध्यक्ष थिए भने शिक्षक युनियनका अध्यक्ष समेत हुन ।
त्यस्तैगरी, सहकारी तथा गरिबी निवारण विभागको प्रमुखमा गोरखाका राजकुमार कोइराला चयन भएका छन् । त्यस बाहेक पनि जीवन गुरुङलाई खानेपानी तथा सरसफाई विभागको उपप्रमुख, अकुर तिमिल्सिनालाई प्रकाशन विभागको उपप्रमुख र सुदिप नगरकोटीलाई जलस्रोत, सिंचाइ तथा उर्जा विभागको उपप्रमुखको जिम्मेवारी दिईएको प्रदेश कमिटीले जनाएको छ ।
