गोरखा । भोलीदेखी नामजुङको बुंकोटघाट हुने ‘श्रीमद्भागवत सप्ताह ज्ञान महायज्ञ’ को तयारी पुरा भएको छ । फाल्गुण २३ गतेदेखी ३० गतेसम्म हुने महायज्ञको तयारी पुरा भएको मुल समारोह समितिका संयोजक सुरेन्द्रबहादुर थापाले जानकारी दिए ।
शहिदलखन गाउँपालिका–९ नामजुङको बुंकोटघाटमा भीमविरेश्वर आध्यात्मिक महोत्सव तथा श्रीमद्भागवत सप्ताह ज्ञान महायज्ञ हुन लागेको हो । सोमबार दिउसोसम्म पाण्डाल निर्माणको काम सम्पन्न भएको र अन्य सबै काम सम्पन्न भएको छ ।
कार्यक्रम अनुसार भोली अर्थात मंगलबार बिहान ११ बजे मन्दिर परिषरबाट कलशयात्रा हुने छ । कलशयात्रा त्रिवेणीमा पुगेर पुनःमन्दिर परिषरलाई परिक्रमा गरेर महायज्ञमा सहभागी हुने कार्यक्रम तय भएको संयोजक थापाले जानकारी दिए ।
महायज्ञलाई उदुघाटन गर्न प्रधानमन्त्री पुष्पकमल दाहाल आउने भनिएता पनि कार्य ब्यस्तताका कारण गोरखा क्षेत्र नम्बर २ (ख) का प्रदेश सभा सदस्य सुरेन्द्रराज पाण्डेले कार्यक्रमको उद्घाटन गर्ने तय भएको आयोजक नामजुङ सेवा समाजले जानकारी दिएको छ ।
भीमवीरेश्वर महादेव मन्दिर स्थानान्तरणका लागि आवश्यक जग्गा खरिद गर्ने उद्देश्यका साथ महायज्ञको आयोजना गरिएको आयोजक नामजुङ सेवा समाजका अध्यक्ष शिव बन्जाराले बताए । महायज्ञमा मुख्य बाचक पण्डित दिनबन्धु पोखरेल रहेको पनि बन्जाराले जानकारी दिए ।
गेम चेन्जर मानिएको बुढी गण्डकी जन बिद्युत आयोजना निर्माण भए पछि ढुवानमा पर्ने उक्त स्थानबाट मन्दिर तथा सत्तललाई स्थानान्तरण गरी उपयुत्त स्थानमा राख्नको लागि जग्गा खरिद गर्ने उद्वेश्यका साथ महायज्ञको आयोजना गरिएको हो ।