गोरखा । अशक्तहरुलाई लक्षित गरेर भीमसेन थापा गाउँपालिकामा ‘भीमसेन थापा लोक कल्याणकारी कोष’ स्थापना गरिएको छ ।
गाउँपालिकाले स्थानीय सरकारको प्रत्याभूति गराउने गरी बिशेष बहु प्रकोपिय बिमा कार्यक्रममा आबद्ध गराउन तथा अशक्तहरुको हकमा बिशेष अभियान सञ्चालन गर्न कोषको स्थापना गरेको हो ।
कोषमा पहिलो पटक गाउँपालिका अध्यक्ष बन्जराले आफ्नो पहिलो महिनाको सेवा सुबिधाबाट आएको रकम उपलब्ध गराएर कोषको औपचारिक स्थापना गरिएको गाउँपालिकाले जनाएको छ ।
पालिकाले सवैलाई बिमामा आबद्ध गराउने तथा अशक्तहरुको हकमा लोककल्याणकारी कोषको प्रयोग र परिचालन गरिने गाउँपालिका अध्यक्ष लोकप्रसाद बन्जराले जानकारी दिए ।
अध्यक्ष बन्जाराका अनुसार योगदानमा आधारित सामाजिक सुरक्षाको नीति कायम गर्दै लैजानका लागि समेत गाउँपालिकाको बैठकबाट यस्तो निर्णय गरिएको जानकारी दिए । लोककल्याणकारी कोष पालिकालाई पूर्णरुपमा सुरक्षित पालिका निर्माणका लागि परिचालन गर्ने योजना रहेकोमा रहेको पनि अध्यक्ष बन्जराले जानकारी दिए ।
गाउँपालिकाले आज एक सार्वजनिक सूचना समेत जारी गर्दै कोषमा आर्थिक सहयोगका लागि सवैलाई अपिल समेत गरेको छ । गाउँपालिकाले इच्छुक दाताहरुलाई न्यनतम १ दिनको पापरिश्रमिक कोषमा जम्मा गरी गाउँपालिकाको लोककल्याणककारी कार्यमा सहभागी हुन अपिल गरेको छ ।
सूचनामा बिभिन्न राष्ट्रिय तथा अन्तराष्ट्रिय संघ संस्था, सामाजिक संघसंस्था, बैंक तथा बित्तिय संस्था, सहकारी उद्यमी व्यवसायी लगायत सवैलाई कोषको मेगा बैंक लिमिटेडमा रहेको खाता नम्बर १०१००१००२५२५४ मा आर्थिक सहयोग गरी लोककल्याणकारी कार्यमा सहभागी हुन अनुरोध गरेको हो ।