गोरखा । गोरखा क्षेत्र नम्बर २ को मतगणना अन्यौलमा परेको छ । निर्वाचनको आयोगको पछिल्लो निर्देशन अनुसार ४–५ स्थानमा एकै पटक मतगणना गर्न भने पछि मतगणना कार्य अन्यौलमा परेको हो ।
बिहान १० बजे बसेको सर्व दलिय बैठकले दिउसो १ बजेदेखी मतगणना गर्ने भनिएता पनि पछिल्लो पटक आयोगको निर्देशनले मतगणनामा अन्यौलता आएको निर्वाचन अधिकृतको कार्यालय क्षेत्र नम्बर २ का निर्वाचन अधिकृत नारदप्रसाद भट्टराईले बताए । ‘एक स्थानमा मतगणना गर्ने गरी सबै तयारी भईसकेको अवस्थामा आयोगले पछिल्लो पटक गरेको परिपत्रका कारण अन्यौलता छाएको’ भन्दै अधिकृत भट्टराईले ‘पुनः ३ बजे सर्व दलिय बैठक बसेर मात्र के गर्ने भन्ने निर्णय लिने’ बताए ।
आयोगको पछिल्लो परिपत्र अनुसार मत परिणाम चाढो सार्वजनिक गर्ने गरी एकै पटक ४–५ स्थानबाट मत गणना गर्न भनेको छ । परिपत्रका कारण एकै स्थानबाट मतगणना गर्ने तयारी थालेको क्षेत्र नम्बर २ को मतगणनामा अन्यौलता देखिएको हो ।
निर्वाचन अधिकृत भट्टराईका अनुसार स्थान अभावका कारण एकै पटक ४–५ स्थानबाट मतगणना गर्न गारो हुने भएकोले सर्व दलिय बैठक पछि मात्र के गर्ने भन्ने निर्णय लिइने छ । गोरखा क्षेत्र नम्बर २ मा ५२ हजार ३९९ जना पुरुष र ५२ हजार ८४१ जना महिला सहित कुल मतदाता संख्या १ लाख ५ हजार २४० जना रहेका छन् ।
हिजो सम्पन्न निर्वाचनमा गोरखा २ मा ५१.१० प्रतिशत मत खसेको थियो ।
