गोरखा । सदरमुकामको बराहमा हिजोराती भएको ट्याक्टर दुर्घटनामा परी चालकको ज्यान गएको छ । सोही दुर्घटनामा परेका सहचालक भने सामान्य घाईते भएको छ ।
आहालेबाट गोरखा बजार तर्फ आउदै गरेको ग १ त ४८७८ नम्बरको ट्याक्टर गोरखा नगरपालिका–८ को बराहमा दुर्घटना भएको थियो । दुर्घटनामा परी आरुघाट गाउँपालिका–१ मान्बु घर भई हाल गोरखा नगरपालिका–५ सतिपिपल डेरी गरी बस्ने बर्ष ३६ का राजु गुरुङको मृत्यु भएको जिल्ला ट्राफिक प्रहरी कार्यालय गोरखाले जनाएको छ ।
सोमबार राती १० बजेतिर भएको उक्त घटनामा परी चालक गुरुङ गंभिर घाईते भएका थिए । उनलाई स्थानिय र प्रहरीको सहयोगमा गोरखा अस्पतालमा सामान्य उपचार पछि थप उपचारको लागि भरतपुर लगिएको थियो । चालक गुरुङको उपचारकै क्रममा सोमबार राती १२ बजे अस्पतालमा मृत्यु भएको थियो ।
सोही दुर्घटनामा परेका सहचालक गोरखा नगरपालिका–८ का ४३ बर्षिय खुमबहादुर थापा सामान्य घाईते भएका छन् । उनको हिजो नै गोरखा अस्प्तालमा उपचार पछि घर फर्किएको पनि प्रहरीले जानकारी दिएको छ ।
सडकबाट ३० मिटर तल बाख्राको खोरमा खसेको ट्याक्टर च्यापिएर स्थानिय १ जना किसानको बाख्रा समेत मरेको छ ।
