गोरखा । बोर्लाङमा भएको गण्डकी प्रदेश स्तरीय अन्तर जिल्ला भलिबल प्रतियोगितामा १६ लाख भन्दा बढी खर्च भएको छ । बोर्लाङ खेलकुद बिकास समितिले आयोजना गरेको भलिबल प्रतियोगितामा १६ लाख ३८ हजार ६२० रुपैयाँ खर्च भएको आयोजनाले पत्रकार सम्मेलन मार्फत जानकारी दिएको हो ।
भीमसेन थापा गाउँपालिका ७ को बोर्लाङमा असोज १२ गतेदेखि १६ गतेसम्म सञ्चालनमा आएको प्रतियोगिता अवधिभरमा १६ लाख ३८ हजार ६२० रुपैया खर्च भएको समितिका अध्यक्ष निराजन श्रेष्ठले जानकारी दिए ।
अध्यष श्रेष्ठले प्रतियोगिता अन्तरर्गत गण्डकी प्रदेश अन्तरजिल्ला पुरुष भलिवल, महिला भलिवल र भीमसेन थापा गाउँपालिका भित्रका वडास्तरीय पुरुष भेट्रान्स् प्रतियोगिताको पुरस्कारमा ४ लाख ६२ हजार २०० रुपैया खर्च भएको पनि आयोजनले जानकारी दिएको थियो ।
प्रतियोगिता सञ्चालनकैलागी भीमसेन थापा गाउँपालिकाले ३ लाख रुपैया, भीमसेन थापा गाउँपालिका वडा नम्बर ७ ले २ लाख ५० हजार, वडा नम्बर ८ ले ५० हजार रुपैया आर्थिक सहयोग प्रदान गरेको अध्यक्ष श्रेष्ठले पत्रकार सम्मेलनमा जानकारी दिए ।
प्रतियोगिता आयोजनाका लागि बिदेश तथा स्वदेशमा रहेका खेलप्रेमी र शुभचिन्तकहरुबाट ८ लाख ४५ हजार ९२० रुपैयाँ आर्थिक संकलन भएको थियो ।
सहयोग गर्नेहरुमा गोरखा समाज मेरिल्याण्ड, ग्लोबल गोरखा समाज, कतारमा रहेका गाउँपालिकाबासीहरुले प्रयोगिता सम्पन्न गर्न आर्थिक सहयोग प्रदान गरेको पनि आयोजनाले जनाएको छ ।
समितिका अनुसार अहिलेसम्म १३ लाख ४५ हजार ९२० रुपैया संकलन भएको र प्रतिबद्धता जनाएका मध्ये १ लाख ३४ हजार ३४४ रुपैया उठ्न बाँकी रहेको पनि पत्रकार सम्मेलनमा जानकारी दिइएको थियो ।
अध्यक्ष श्रेष्ठका अनुसार पुरै रकम उठदा पनि समितिलाई १ लाख ५८ हजार ३५६ रुपैयाँ घाँटा हुन गएकोले घाँटा पुर्तिका लागि आउदै गरेको शुभ दिपावलीको अवशरमा देउसी भैलो कार्यक्रम गरेर परिपूर्ति गर्ने योजना समितिले बनाएको छ ।
पत्रकार सम्मेलनमा भीमसेन थापा गाउँपलिकाका अध्यक्ष लोकप्रसाद बन्जराले समितिले सहयोग मागेरै प्रदेश स्तरीय भलिवल प्रतियोगिता गर्न सफल भएको भन्दै प्रसंसा गरेका थिए । उनले प्रतियोेगिताले गाउँपालिकाको मात्र नभएर प्रदेशकै भलिबल खेल क्षेत्रमा नयाँ इट्टा थप्न सफल भएको बताए ।
पत्रकार सम्मेलनमा भीमसेन थापा गाउँपालिका–७ का वडाध्यक्ष नारायण श्रेष्ठ, ८ का वडाध्क्ष बिष्णुकमार श्रेष्ठ, समाजसेबी बुद्धि श्रेष्ठ समेतको सहभागिता रहेको थियो ।