सन्दर्भ तस्बिर
गोरखा । पूर्व प्रधानमन्त्री एवं नेपाल समाजबादी पार्टीका अध्यक्ष डा.बाबुराम भट्टराईले प्रतिनिधिसभा चुनाव नलड्ने बताएका छन् । उनले सामाजिक सञ्जाल मार्फत आज गोरखा क्षेत्र नम्बर २ बाट निर्वाचन नलड्ने घोषणा गरेका हुन ।
समाजिक सञ्जालमा लामो स्टाटस लेख्दै डा.भट्टराईले आफुलाई गोर्खाली जनताले ३ पटकसम्म निर्वाचन जिताएर जनताको सेवा गर्ने अबसर दिएको सवै मतदातालाई धन्यबाद दिदै ‘आगामी २०७९ मंसीर ४ को प्रतिनिधिसभा निर्वाचनमा म उम्मेदवार नबन्ने यहाँहरू सबैलाई विनम्र जानकारी गराउन चाहन्छु, भनेका छन् ।
उनले ‘चुनाव नलड्नु भनेको राजनीति छोड्नु हैन !’ चुनाव नलडेपनि आफू पार्टीको काम र जनताको सेवामा निरन्तर लागिरहनेछु ।’ डा.भट्टराईले सामाजिक सञ्जालमा लेखेका छन् ।
बिस २०६४ र २०७० को संविधानसभा र २०७४ को प्रतिनिसभा चुनावमा गोरखा क्षेत्र नम्बर २ बाट चुनाव जितेका थिए । आफूले ३ पटक चुनाव जितेर गोरखाको दुरगामी विकासमा योगदान पुर्याएको र भौतिक पूर्वाधारको पनि बिकास गरेको उनले दावी समेत गरेका छन् । ‘मेरो कार्यकालमा गोरखाको दूरगामी विकास र समृद्धिका लागि आधारभूत भौतिक तथा सामाजिक पूर्वाधारहरू बनेका छन्, डा.भट्टराईले भनेका छन्, ‘केही शुरूभएका आयोजना पूरा हुन बाँकी छन् ।’
उनले बाँकी रहेका आयोजना पूरा गर्न र ती पूर्वाधारको जगमा अब उत्पादन र रोजगारमुखी योजना तथा कार्यक्रम ल्याएर ऐतिहासिक गोरखालाई देशकै नमूना विकासको केन्द्र बनाउन आफू संसदमा नरहे पनि निरन्तर सक्रिय योगदान गर्ने प्रतिबद्धता समेत पूर्वप्रधान मन्त्री डा.भट्टराईले गरेका छन् ।