गोरखा । गोरखाको बारपाकमा आज भएको दौड प्रतियोगितामा नवराज गुरुङ प्रर्थम हुन सफल भएको छ । बारपाक सुलिकोट गाउँपालिकाको बारपाकमा शनिबार सम्पन्न भएको आठौ बारपाक खुल्ला दौड प्रतियोगिता’को उपाधी गुरुङले हात पार्न सफल भएको हो ।
बारपाक मित्रता समाजको आयोजनामा भएको प्रतियोगितामा गुरुङले निर्धारित ८.५ किलोमिटरको दुरी ४३ मिनेट ५८ सेकेण्डमा पुरा गरेको आयोजक संस्थाले जानकारी दिएको छ ।
बारपाक सुलिकोट गाउँपालिकाको मान्द्रेदेखि बारपाक बजारको मनिडाँडासम्म दौड प्रतियोगिताको आयोजना गरिएको थियो ।
प्रतियोगितामा निर्धारित दुरी ४६ मिनेट १६ सेकेण्डमा पुरा गर्दै सुकबहादुर गुरुङ दोस्रो हुन सफल हुनुभएका थिए ।
त्यस्तै गरी, दौडमा बीरबहादुर गुरुङले निर्धारित दुरी ४६ मिनेट ४२ सेकेण्डमा पुरा गरी प्रतियोगितामा तेस्रो स्थान हात पार्न सफल भएको थियो ।
प्रतियोगितामा ५४ जना धावकहरुको सहभागिता रहेको थियो । बिजेताहरुलाई नगद पुरस्कार सहित मेडल र प्रमाण पत्र प्रदान गरिएको आयोजकले जनाएको छ ।