गोरखा । गोरखाको शहीद लखन गाउँपालिकाले पालिका भित्रका गर्भवती महिलाहरुलाई गाउँमै निःशुल्क भिडियो एक्सरे सेवा प्रदान गर्न थालेको छ ।
गर्भवती महिला र गर्भमा रहेका शिशुको स्वास्थ्य अबस्थाको जानकारी लिन वडा–वडामा रहेका स्वास्थ्य चौकी तथा आधारभूत स्वास्थ्य इकाई मार्फत पालिकाले निःशुल्क भिडियो एक्सरे सेवा दिन थालेको स्वास्थ्य शाखाका प्रमुख बिरेन्द्र श्रेष्ठले जानकारी दिए ।
गाउँपालिकाले चालु आर्थिक बर्षको तेस्रो चरणमा पालिका भित्रका बिभिन्न ९ वटा स्वास्थ्य संस्थाबाट ५७ जना गर्भवती महिलाहरु भिडियो एक्सरे सेवा प्रदान गरेको थियो ।
भिडियो एक्सरेबाट आमा र गर्भमा रहेको बच्चाको स्वास्थ्य अबस्था बुझ्न सजिलो हुने स्वास्थ्य प्रमुख श्रेष्ठको जानकारी दिए ।
गाउँपालिकाले ग्रामिण अल्ट्रासाउण्ड कार्यक्रम अन्तरर्गत वडामा रहेका स्वास्थ्य संस्था मार्फत गर्भवती महिलाहरुको गर्भावस्थाको जाँच गर्न थालेको गाउँपालिकाले जनाएको छ ।
अहिले गाउँपालिकाको बक्रांङ स्वास्थ्य चौकी, मनकामना आधारभुत स्वास्थ्य केन्द्र, मनकामना स्वास्थ्य चौकी, ताक्लुङ स्वास्थ्य चौकी, ताक्लुङ आधारभुत स्वास्थ्य केन्द्र, घैरुङ स्वास्थ्य चौकी, बुङकोट स्वास्थ्य चौकी, बुङकोट आधारभुत स्वास्थ्य केन्द्र र नाम्जुङं स्वास्थ्य चौकीबाट सेवा उपलब्ध गराइएको छ ।
गर्भवती महिलाहरुको गर्भमा रहेको बच्चाको स्वास्थ्य अवस्था थाहा पाउन र समयमै समस्याहरुको पहिचान गर्ने उदेश्यले पालिका भित्र नै गर्भवती महिलाहरुका लागी निःशुल्क भिडियो एक्सरे सेवा सुरु गरेको गाउँपालिका अध्यक्ष रमेशबाबु थापामगरले जानकारी दिए । प्रोटेबल भिडियो एक्स रे मेसिनको साथमा स्वास्थ्यकर्मीले वडावडामा पुगेर सेवा दिदै आएको उनले जानकारी दिए ।
गाँउपालिकाले यो सेवा सुरु गर्नुअघि पालिका भित्रका गर्भवती महिलाहरु गर्भावस्थाको परिक्षणका लागी गोरखा अस्पताल पुग्नुपर्ने बाध्यता रहदै आएको थियो । अहिले पालिका भित्रैबाट प्रत्येक वडामा पुगेर सेवा दिन सुरु गरेसंगै गर्भावस्थामा हुनेसक्ने समस्याहरुको समयमा नै पहिचान गरी उपचार गर्न सकिने अवस्थामा पालिकाको पुगेको छ ।
