गोरखा । हालै सम्पन्न स्थानिय तहको निर्वाचनमा खर्च विवरण पेश नगर्ने गोरखाका ४८ जना उम्मेदवारहरु कारवाहीमा परेका छन् । जिल्लाको ११ पालिकामा मध्ये अध्यक्षको उमेदवार बनेका २६ जना र उपाध्यक्षका उम्मेदवार बनेका २२ जना कारवाहीमा परेको निर्वाचन आयोगले जनाएको छ ।
समयमा खर्च विवरण पेश नगर्ने मध्ये गोरखा नगरपालिकामा मेयरका उमेद्वार बनेका राप्रपाका रुद्रराज पाण्डे, एकिकृत समाजबादी पार्टीका सानुमाया बस्नेत, स्वतन्त्र उमेद्वार योगेन्द्र कुमाललाई समयमा खर्च बिबरण नबुझाएपछि जरिवानामा गरिएको हो । आयोगले उनीहरु सबैलाई जनही ४ लाख ४० हजार रुपैया जरिवाना तोकेको हो ।
त्यस्तै पालुङटार नगरपालिकाबाट मेयरका उमेद्वार रहेका जनता समाजबादी पार्टीका प्रेमबहादुर गुरुङ, एमालेका हरी भट्ट, राष्ट्रिय प्रजातन्त्र पार्टीका गोपालबहादुर थापा, स्वतन्त्र उमेद्वार बलराम तामाङ, रामचन्द्र काफ्ले र एकिकृत समाजबादी पार्टीका शिवराज पौडेल, आमूल परिवर्तन मसिहा पार्टी नेपालका बेदबहादुर लामालाई पनि जनही ४ लाख ४० हजार रुपैया जरिवाना नै तोकेको आयोगले जनाएको छ ।
यता गोरखा नगरपालिकामा उप्रमुखको उमेद्वार रहेका राष्ट्रिय प्रजातन्त्र पार्टीका सम्झना लामिछाने, एकिकृत समाजबादीका यादब बस्नेत, पालुङटार नगरपालिकाबाट उपप्रमुखको उमेद्वार रहेका स्वतन्त्र उमेद्वार राजन देवकोटा कारवाहीमा परेका हुन् ।
जिल्लाको ९ गाउँपालिकामा निर्वाचन खर्च बिबरण नबुझाएका १६ जना गाउँपालिका अध्यक्षका उमेद्वारलाई पनि आयोगले जरिवाना तोकेको छ ।
निर्वाचन खर्च नबुझाउनेहरुमा आरुघाट गाउँपालिका निर्वाचित पालिका अध्यक्ष राजु गूरुङ, गण्डकी गाउँपालिकाका निबर्तमान पालिका अध्यक्ष होमबहादुर राना र चुमनुव्री गाउँपालिका निर्बतमान अध्यक्ष धनबहादुर गुरुङ सहित ३ जनालाई पनि आयोगले जरिवाना तिर्न भनेको छ ।
त्यस्तै गरी, भीमसेन थापा गाउँपालिकामा काँग्रेसबाट पालिका अध्यक्षका उम्मेदवारी दिएका रोसन गुरुङ सहित ४ जना, बारपाक सुलिकोट गाउँपालिकामा काँग्रेसका उम्मेदवार जीतबहादुर घले सहित २ जना, अजिरकोट गाउँपालिकाका ३ जना र सिरानचोक गाउँपालिकाका २ जना अध्यक्षका उम्मेदवारलाई पनि निर्वाचन आयोगले जरिवाना तोकेको जनाएको छ ।
तोकिएको समयमा निर्वाचन खर्च नबुझाउने ९ पालिकाका २२ जना उपाध्यक्षका उमेद्वारहरुलाई पनि आयोगले जरिवाना तोकेको छ । निर्वाचन खर्च नबुझाउने पालिका उपाध्यक्षहरुमा आरुघाट गाउँपालिकाकी उपाध्यक्ष कल्पना नेपाली, जसपाकी कुलमाया बराम, गण्डकी गाउँपालिकाकी उपाध्यक्ष ललिता अधिकारी सहित ३ जना, भीमसेन थापा गाउँपालिकाकी उपाध्यक्ष अमृतादेवी वस्ती (भट्ट) सहित ४ जना रहेको छन् ।
चुमनुब्री गाउँपालिकामा १ जना, धार्चे गाउँपालिकाका १ जना, अजिरकोट गाउँपालिकाका १ जना, सिरानचोक गाउँपालिकाका ६ जना र बारपाक सुलिकोट गाउँपालिकामा उपाध्यक्षको उमेद्वार रहेका ५ जनालाई पनि आयोगले कारवाही गरिवाना गरेको जनाएको छ ।
आयोगले खर्च बिबरण नबुझाउने गाउँपालिका प्रमुख र उप्रमुखलाई जनही ३ लाख ५० हजार रुपैया जरिवाना तोकेको हो ।
आयोगले समयमा निर्वाचन खर्च बिबरण नबुझाउने उमेद्वारहरुलाई स्पटीकरण सोधेको भएपनि चित्तबझ्दो जवाफ नआएकाले जरिवाना तोकेको जनाएको छ ।
उनीहरुले आयोगले तोकेको जरिवाना नबुझाएको खण्डमा बहालवाला पदाधिकारीको ६ महिना भित्र पद खारेज हुने र अन्यको हकमा ६ बर्षसम्म उम्मेदवार बन्न नपाउने ऐनमा ब्यवस्था गरेको छ ।
