गोरखा । गोरखा सदरमुकामको खेलकुद मैदान हुने ‘तेस्रो गोरखकाली मेला’को तयारी पूरा भएको आयोजक संस्थाले जनाएको छ ।
हरमटारी क्बलद्वारा आयोजना गरिएको मेलाको सबै तयारी पुरा भएको आयोजक संस्थाका महासचिव किरण ढकालले जानकारी दिएको हो ।
ब्यापारी स्टलका साथै बाल उद्यान र मनोरञ्जन तथा मुख्य स्टेजको कामहरु पुरा भएको छ । तर केही सामान्य प्राविधिक काम मात्र गर्न बाँकी रहेको त्यो पनि आजै सक्ने तयारीमा क्लव लागेको पनि महासचिव ढकालले बताए ।
भोली अर्थात मंगलबारदेखी सञ्चालनमा आउने मेलाको पुर्व सांसद तथा माओवादी नेता हरिराज अधिकारीले उद्घाटन गर्ने कार्यक्रम तय भएको छ । मेला असोज १४ गतेसम्म सञ्चालनमा आउने क्लवले जनाएको छ ।
‘मेला अवधीभरमा विभिन्न जातजातीको खानाका साथै जाती विशेषको मौलिकता झल्कने गरी सँस्कृतिक कार्यक्रम हुने छ । मेलाले गोरखाको पर्यटन प्रर्वद्वनका साथै आर्थिक र ऐतिहासिक स्थानको पहिचान हुने पनि क्लबले जनाएको छ ।
मेलामा स्थानीय तथा राष्ट्रिय स्तरका कलाकारहरुको प्रस्तुति रहने छ । यस पटकको मेलामा परिसरभित्र भित्रै डाक्टर सहितको आकस्मिक स्वास्थ्य शिविर रहने पनि आयोजक संस्थाले जनाएको छ ।
१४५ वटा स्टल रहेको मेलाको करिब ३५ हजार दर्शकले अवलोकन गर्ने अनुमान आयोजकले गरेको छ ।
तेस्रो गोरखकाली मेला आयोजनाका लागि ५२ लाख आम्दानी हुने र ४७ लाख खर्च हुने अनुमान गरिएको छ । जम्मा पाँच लाख बचत हुने अनुमान गरिएको र सो रकम गोरखकाली रनिङ कप आयोजना गर्ने बाँकी बचत भएको रकम सामाजिक क्षेत्रमा खर्च गरिने मेलाका संयोजक श्रेष्ठले जानकारी दिए ।
दरबारदेखि दरबार सम्मको पदयात्रा कार्यक्रममा पनि संचालन हुने उनले बताए । राष्ट्रिय खेलकुद परिषद, जिल्ला खेलकुद विकास समिति, गोरखा नगरपालिका वडा नं ६ को कार्यालयको अनुमतिमा खेलमैदानमा मेला आयोजना गर्ने क्लवले जनाएको छ ।
