गोरखा । ‘लिगलिगकोट–सिरानचोक–गोरखा दरबार दोस्रो खुल्ला म्याराथुन दौड २०७९’ सम्पन्न भएको छ । दोस्रो पटकको म्याराथुनमा पनि नेपाली सेनाकै जवानहरुले पदक हात पारेका छन् ।
यस पटक ३ घण्टा ११ मिनेटमा निर्धारित दुरी पार गर्दै शनिवार नेपाली सेनाको भबानी दल गणका जमदार तिर्थबहादुर तामाङ बिजयीले १ लाख ५० हजार नगद सहित प्रमाण पत्र र मेडल हात पारे ।
गोरखा र पालुङटार नगरपालिका, सिरानचोक गाउँपालिका तथा नेपाली सेनाको रिपुमर्दन गणको संयुत्त आयोजनामा भएको म्याराथुनमा ३ घण्टा १२ मिनेटमा निर्धारित दुरी पार गर्दै भारतीय सेनामा कार्यरत अनिश थापा मगरले पार गरेका थिए । थापामगरले भने १ लाख नगद सहित प्रमाणपत्र र मेडल हात पारेका थिए ।
उता म्याराथुनमा तेस्रो स्थान भने नेपाली सेनाको बरख गणका मोहनदेव जोशीले हात पारेका छन् । उनले निर्धारित दुरी ३ घण्टा १५ मिनेटमा पुरा गरेको आयोजकले जनाएको छ । जोशीले नगद ७५ हजार सहित मेडल र प्रमाणपत्र हात पारेका थिए ।
पहिलो म्याराथुनमा पनि नेपाली सेनाकै दवदवा रहेको थियो । यस पटक पनि नेपाली सेनाका विभिन्न पदका ब्यक्तिले पदक हात पार्न सफल भएका छन् । चौथो स्थानमा चण्डिप्रसाद गणका देबराज महतारा र पाँचौ स्थानमा भिमकाली गणका गोबिन्द कार्की पर्न सफल भएका छन् । महताराले नगद ५० हजार र कार्कीले ३५ हजार नगद सहित मेडल र प्रमाणपत्र हात पार्न सफल भएका हुन् ।
आयोजकले १०औं स्थानसम्मका खेलाडीलाई नगदको ब्यवस्था गरेको थियो । त्यस्तै गरी छौठौं स्थानमा सोलोखुम्बु महाकुलुङका अर्जुन राई कुलुङ, सातौं स्थानमा महेन्द्र दल गणका थमबहादुर अधिकारी र आठौं स्थानमा गोरखा सिरानचोक ५ गोरखाका अशोक बराम पर्न सफल भएका थिए । त्यस्तै गरी नवौं स्थानमा भुतपूर्व सैनिक रैबतबहादुर दाहाल र दसौं स्थानमा महाविर सौर्य गणका बिमल खड्का पर्न सफल भएका थिए । उनीहरुले ३०, २५, २०, १५, १० हजार नगद सहित मेडल र प्रमाणपत्र पाउन सफल भएका थिए ।
इतिहासको प्रर्वद्धन गर्ने र एकिकृत ट्रेलको रुपमा बिकास गर्ने गरी नेपाली सेनाको सहकार्य गर्दै गोरखा र पालुङटार नगरपालिका र सिरानचोक गाउँपालिकाले पहिलो पटक २०७६ सालमा म्याराथुन सुरु गरेको थियो ।
कोरोना महामारीका कारण रोकिएको म्याराथुन २ बर्ष पछि फेरी आयोजना गरिएको हो । जिल्लामा यो नै ठुलो राशीको भ्याराथुन हो ।