हिन्दीमा जब दुई व्यक्तिको तुलना गर्ने गरिन्छ, त्यसबेला प्रायः भन्ने गरिन्छ– एक वो थे और एक ये हैँ !
कन्टिर–बाबूले अहिले यो कुरा चन्द्रागिरि चर्चाको सन्दर्भमा सम्झेका हुन् । आधुनिक नेपालको राजनीतिक इतिहासको अध्ययन गर्दा चन्द्रागिरि डाँडोको बडो चर्चा भएको पाइन्छ । नेपाल राष्ट्रका निर्माता पृथ्वीनारायण शाहले यहीँबाट पहिलोपल्ट काठमाडौँ उपत्यका देखेका थिए र नेपाल एकीकरणको सपना सँगालेका थिए ।
पछिल्लो पटक माकुने कमरेडले पनि आफ्नो पछिल्लो राजनीतिक यात्राको प्रारम्भ यही चन्द्रागिरि डाँडोबाट गर्ने सोच बनाएछन् । सायद त्यसैले होला एमाले विभाजनपछि माकुने नेतृत्वमा एकीकृत भनिए पनि अमिवाजस्तो एमालेबाट टुक्रिएर फैलिन चाहेको समाजवादी समूहले पहिलो बैठक बस्न यहीँ ठाउँ रोजेको ।
कन्टिर–बाबू भन्छन्– तात्कालिक कारण, परिणाम र खर्च जे भए पनि दुई दिनसम्म चल्ने यो बैठकले भोलिको नेपाली राजनीतिलाई निश्चय पनि धेर–थोर प्रभावित पार्नेछ ।
कन्टिर–बाबूको प्रश्न छ– पार्टी व समूहको बैठक बस्न नेपालमा यत्रो ठाउँ हुँदाहुँदै माकुनेले चन्द्रागिरि डाँडो नै किन रोजे ? उत्तर पनि कन्टिर–बाबू नै दिन्छन्– माकुने सायद पृथ्वीनारायण सम्झेर, पृथ्वीपथमा अग्रगामी छलाङ लगाउने योजना बुन्न चिन्तन–विमर्शका लागि त्यहाँ गएको हुनुपर्छ ।
पृथ्वीनारायणले त्यहाँबाट नेपाल हाँक्ने सपना देखेका थिए । माकुनेले पनि त्यहाँ गएर नेपालको राजनीतिको एक नम्बर खेलाडी बन्ने सोच राखेको हुनसक्छ । जे होस्, कन्टिर–बाबूको शुभकामना छ । आखिर कन्टिर–बाबू पनि लक्ष्य समाजवादवाला राजनीतिक लाइन र बिरादरीका परे । त्यति हो कन्टिर–बाबूको समाजवादअघि प्रजातान्त्रिक शब्द जोडिएको छ ।
कन्टिर–बाबू कामना गर्छन्– माकुने समूहको नामअगाडि कमनिस्ट शब्द भए पनि चन्द्रागिरिबाट रिफ्रेस भएर आउनेछ– प्रजातान्त्रिक समाजवादी लाइन ।
