आशुतोष झा नवीन नाम भएका एक जना भ्रष्टाचारविरोधी मित्रले प्रदेश २ मा शिक्षाक्षेत्रमा व्यापक भ्रष्टाचार भएको भन्दै सामाजिक सञ्जाल ट्विटरमार्फत जानकारी बाँडेका छन् ।
यस्तो गुप्त तर गम्भीर जानकारी पाएर कन्टिर–बाबू बिहानैदेखि परेसान छन् । जानकारी पाएलगत्तै उनी यति अत्तालिए कि आँखा रित्तो बनाउँदै नाक र कान छोडेर कुन बेला चस्मा भुइँमा झर्यो उनले पत्तै पाएनन् ।
नवीनजीले पस्केको जानकारीअनुसार लकडाउनमा स्कुल बन्द भयो त के भो ? विद्यार्थीको खाजा भने बन्द भएन । खाजा खर्चका नाममा तीन जिल्लामा मात्र १४ करोडभन्दा बढी रुपैयाँ खर्च भएको छ ।
सामाजिक सञ्जालमार्फत बाहिरिएको यो गुढ–गम्भीर जानकारीसँगै यतिबेला कन्टिर–बाबूको मनमा अनेकथरि जिज्ञासाले हिलकोर मारिरहेको छ । कन्टिर–बाबूको प्रश्न छ– स्कुल बन्द भएको बेला, खाजा कसले खाए ? कसरी खाए ? कहाँ बसेर खाए ? लकडाउनमा खाजा कहाँ र किन खरिद गरियो ? के विद्यार्थीलाई जुन, मिट र टिम प्रविधिमार्फत खाजा खुवाइयो ? कि आपसी मिलापत्र गरेर कागजमा खाजा खाइयो ?
कन्टिर–बाबूका यी प्रश्नको उत्तर कसले दिने ? देशमा सूचनाको हकसम्बन्धी कानुन छ । प्रत्येक जनतालाई आफूले चाहेको सूचना माग्ने र मनमा लागेको प्रश्न गरेर उत्तर पाउने अधिकार छ । कन्टिर–बाबूलाई पनि यो अधिकार छ ।
यदि कन्टिर–बाबुको प्रश्नको जबाफ वा त्यससम्बन्धी कुनै सुराक थाहा भए कृपया कन्टिर–बाबूलाई इन–बक्स गरिदिनुहोला । त्यस्तो नेक कामका लागि कन्टिर–बाबूले अवश्य पनि तपाईलाई मुरीमुरी धन्यवाद दिनेछन् । र भेट भएको बेला एक कप कफी अवश्य पिलाउने छन् ।
कन्टिर–बाबू भन्छन्– माथिको दृष्टान्तका आधारमा शिक्षाक्षेत्रमा कति धेरै भ्रष्टाचार छ, त्यो प्रष्ट बुझ्न सकिन्छ । तर अचम्म यसको खोजबिन सरकारको प्राथमिकतामा पर्दैन । अहिलेसम्म शिक्षामन्त्री पनि नियुक्त गर्न नसकेको सरकारले भविष्यमा यसबारे कस्तो रवैया अपनाउनेछ, त्यो हेर्न बाँकी छ ।
कन्टिर–बाबूले पाएको जानकारीअनुसार बाहिर–बाहिर लकडाउन, भित्रभित्रै खाजावाला यस प्रकरणमा धनुषा, सिरहा र रौतहटमा १४ करोड खर्च भएको छ । बाँकी खोजी गर्ने काम पत्रकार र स्थानीय प्रबुद्ध बुद्धिजीवीको हो, सरोकारवाला निकायको हो ।
