कन्टिर–बाबूको मुखमा हिजोदेखि हिन्दीको एउटा गीत झुन्डिएको छ– दिल अपना और प्रिय पराई ।।। १ अर्थात् हृदय आफ्नो भए पनि माया–पिरती त अर्काको हो । दुनियाँमा माया–पिरती यस्तो चिज हो, जसलाई आफ्नो जिम्मामा लिन त सकिन्छ तर माया गर्ने भनिएकाहरूको ग्यारेन्टी गर्न सकिन्न ।
हिन्दीको यसै गीतसँग मिल्दोजुल्दो गीत नेपालीमा पनि रहेको कन्टिर–बाबूलाई थाहा छ । सिन्दुर सिनेमामा प्रयोग भएको त्यो गीत सम्झिँदै कन्टिर–बाबू गुन्गुनाउँछन्– अलि(अलि हार हो, अलि(अलि जित । कहिले पराई, कहिले मित, यही हो जीवन, अनमोल गीत १
कन्टिर–बाबूले प्रसङ्गवश सम्झेका हिन्दी र नेपाली दुवै गीतको आसय भने उस्तै–उस्तै छ । को आफ्नो र को पराया हो, त्यो निश्चित हुँदैन । कन्टिर–बाबू भन्छन्– नेपाली राजनीति र यसका अग्र पात्रहरूको प्रवृत्ति पनि अहिले यस्तै अवस्थामा पुगेको देखिँदै छ ।
राजनीति भन्ने कुरो पनि बडो विचित्रको हुन्छ । कुन बेला के हुन्छ ? को कुन बेला मित्र वा शत्रु बन्छ ? को नजिकिन्छ को टाढिन्छ, केही थाहा हुँदैन । युगौँदेखिका शत्रु मित्र र वर्षौका मित्र शत्रु हुने भन्ने कुराको कुनै अत्तोपत्तो हुँदैन ।
त्यसो त कन्टिर–बाबू मान्छन्, राजनीतिमा कोही पनि स्थायी शत्रु र स्थायी मित्र मानिँदैनन् । राजनीतिमा साम, दाम, दण्ड, भेद प्रयोगलाई पनि सामान्य मानिन्छ । तर गर्नेले कसैसँग मित्रता वा शत्रुता जे गरे पनि ‘निष्ठा’का साथ गरुन् । बेइमानी पनि इमानदारीसाथ गरुन् । जुन थालमा खायो त्यही थालमा फोहोर गर्यो भने जस्तो नसुहाउँदो काम नगरुन् भन्ने कन्टिर–बाबूको भनाइ हो ।
विचरा माकुने अहिले यही हविगतमा पुगेको कन्टिर–बाबूको ठम्याइ छ । वर्षौदेखिका सहयात्री बफादार भनाउँदाहरूले माकुनेलाई चटक्कै छोडेको खबर सुनेदेखि कन्टिर–बाबू मुरलीधरले गाएको अर्को एउटा गीत सम्झिरहेका छन्– उडायो सपना सबै हुरीले !
तिनै रावल, भट्टराई, पन्त, शाक्य, भुसाल आदिका भरमा तिनैको राजनीतिक जीवन सुरक्षाका लागि ७० वर्ष पुग्न केही महिना बाँकी रहेका माकुने, आफ्नै राजनीतिक जीवन दाउमा लगाएर पार्टी विभाजन गर्ने तहमा पुगेका होइनन् र ? तर आज तिनैले माकुनेलाई तीन बल्ड्याङ पल्ट्याइदिएको देख्दा कन्टिर–बाबूलाई पनि नरमाइलो लागेको छ ।
वाह रे नेपालका राजनीतिकर्मीको राजनीति गर्ने तरिका ! आफ्नो वर्षौँको साखलाई जोखिममा राखेर माकुनेले पूर्वपराजित सेनापतिहरूको भारमा एमाले युद्ध जित्ने सपना देखेका थिए । तर मित्रहरूको धोकाघडीले विचरा उनको त्यो सपना त पूरै प्रभावित हुने सम्भावना पो देखियो ।
तर कन्टिर–बाबू, नेपालको राजनीतिमा जे पनि हुनसक्ने देखिरहेका छन् । जसरी प्रायः क्रिकेट खेलमा अन्तिम बल नफालुन्जेल हारजितको परिणाम यस्तै हुन्छ भन्न गाह्रो हुन्छ, उसरी नै भोलीका दिनमा नेपाली राजनीतिको दाउ नउल्टिएला भन्न सकिन्न ।
अहिलेका लागि कन्टिर–बाबू परम मित्रहरूको धोकाघडीबाट पीडित बनेको नेतृत्वका पक्षमा समान दुःख मनाउ गर्नबाहेक केही गर्न सक्दैनन् ।
