कसैले तपाई भनोस् कि नभनोस् कन्टिर–बाबू आफैँले आफैँलाई तपाई भन्छन् । तर यो रोग हो भने यो रोग कन्टिर–बाबूलाई मात्र छैन, अरूलाई पनि छ । लागे पागे बुढबा–बुढियाके दोष है ! कन्टिर–बाबूलाई लाग्छ, पत्रकारितासँग सम्बन्धित प्रेस काउन्सिल भन्ने संस्था पनि अहिले कन्टिर–बाबूकै जस्तो रोगबाट ग्रसित छ ।
लु जा, मपाइँत्वकै कुरा त हो नि, कन्टिर–बाबू आफूलाई प्रेस, विचार तथा अभिव्यक्ति स्वतन्त्रताका अब्बल दर्जाका पक्षपाती मान्छन् । कुनै पनि बहानामा प्रेसलाई नियन्त्रित गर्ने सोचविरुद्ध यत्र, तत्र, सर्वत्र हुन्छन् कन्टिर–बाबू ।
तर प्रेस, विचार तथा अभिव्यक्ति स्वतन्त्रताको मुख्य सरोकारवाला प्रेस पनि जिम्मेवार भने हुनुपर्छ । यस आधारमा प्रेसको नियमन गर्नुपर्ने कुराप्रति भने कन्टिर–बाबू सहमत छन् । कन्टिर–बाबू स्पष्ट छन्– तर नियमनका नाममा कुनै सरोकारवाला निकायले सीमा नाघ्न चाहिँ मिल्दैन ।
कन्टिर–बाबू र उनका मित्रहरूले पहिलेदेखि भन्दै आएका हुन्– अनलाइन सञ्चालन निर्देशिका २०७३ (पहिलो संशोधन २०७४) असङ्गत छ । अरे यार, सूचना तथा प्रशारण विभागमा दर्ता भएपछि अनलाइनहरू प्रेस काउन्सिलमा सूचीकरण गर्नुपर्ने किन ? आचारसंहिताकै अनुगमनका लागि हो भने त काउन्सिलले सूचना विभागसँग दर्ता भएका अनलाइनको सूची मागे, प्रयोग गरे भइहाल्यो । विभागका महानिर्देशक काउन्सिलका पदेन सदस्य–सचिव जो हुन्छन् ।
कन्टिर–बाबूलाई लाग्छ– सूचीकरणको यो प्रावधान घुमाउरो पाराले अनलाइन सञ्चालनमाथि काउन्सिलको हस्तक्षेपकारी मनसाय हो । खै कन्टिर–बाबू र उनका मित्रहरूले कुरो नबुझेका हुन् कि राज्यले बुझ पचाएको हो ?
अनि अर्को कुरो, साउन २६ गतेको मितिमा काउन्सिलले एक विज्ञप्ति जारी गरेर अनलाइन सञ्चालनका सन्दर्भमा आचारसंहितासम्बन्धी तालिम लिनुपर्ने र यो तालिम काउन्सिल आफैँले सञ्चालन गर्ने जनाएको छ ।
कन्टिर–बाबू भन्छन्– ल, यहाँसम्म त कुरा ठीकै होला तर तालिमका लागि काउन्सिललाई पाँच हजार रूपैयाँ शुल्क बुझाउनु पर्ने रे ? नबुझिएको कुरो यो शुल्क लिनुको उद्देश्य भने के होला ? सरकारी संयोजनमा तालिम चलाउने हो भने काउन्सिलले यस्तो शुल्क लिन मिल्छ ? मूल काम नै आचारसंहिताको प्रचार–प्रसार र अनुगमन भएको संस्थाले आचारसंहिताकै नाममा रकम असुल्न एक सुता सुहाउने कुरा होइन ।
कन्टिर–बाबूको विचारमा यस्तो प्रावधान अनलाइनलाई जिम्मेवार बनाउनुभन्दा पनि यसको सञ्चालन प्रक्रियालाई हतोत्साहित गर्ने जस्तो भयो । हुनसक्छ कन्टिर–बाबूले कुरा नबुझेको पनि । बुझेका कसैले इन–बक्समा जानकारी गराइदिन सादर आग्रह गछन् ।
koshionline
