कन्टिर–बाबूलाई हाम्रा ओल्बा बडा गजबका लाग्छन् । हास्यरसले भरिपूर्ण ओल्बाका गफले जस्तै निरस मानिसलाई पनि हँसाउने र सरस बनाउने अपूर्व क्षमता राख्छन् ।
यस्तो महत्त्वपूर्ण गुण सबै जनामा हुँदैन । कहिलेकाहीँ त कन्टिर–बाबूलाई लाग्छ, के खायो भने ओल्बाको जस्तो अद्भूत गुण आफूमा आउँछ होला ? थाहा पाए हल्का ट्राइ मार्न हुन्थ्यो ।
यस्तै हास–परिहासपूर्ण व्यवहार ओल्बाले हिजो संसदमा प्रस्तुत गरेका छन् । भनिरहनु नपर्ला ओल्बाले यही संसदको मर्ममा दुईपल्ट प्रहार गरेर कोमामा पुर्याएका थिए । अदालतले पानी छम्केर ब्युँताएको हो ।
अरे यार, देशको सर्वशक्तिमान शासक, दुईतिहाइवाला कार्यकारी प्रमुख भएर करिब ४० महिना बिताउँदा आफूले गर्न नसकेका काम ओल्बाले नयाँ सरकारबाट तत्काल हुनुपर्ने अपेक्षा गरेका छन् । आफूले केही पनि नगर्ने अनि अरूलाई तत्कालै जिम्मेवारी भिराउने कुरा कति उचित हो ?
कन्टिर–बाबू भन्छन्– यसको अर्थ देउवा सरकारले केही पनि नगर्नुपर्ने भन्ने होइन तर समय त दिनुपर्यो नि । सरकारको काम–कारबाहीको मूल्याङ्कन गर्न कम्तीमा सय दिनको समय दिने त एक किसिमले अन्तर्राष्ट्रिय राजनीतिक परम्परा नै हो ।
जगजाहेर छ, ओल्बाले जिन्दगीभर सत्ता र शक्तिको दिवास्वप्न देखे । सत्ता उन्मादमा उनले गफमात्रै त गरे नि, सार्थक काम त उनीबाट के भयो र खै ? तपाईलाई थाहा छ, यो प्रश्न कन्टिर–बाबू एक्लैको मात्र होइन । ओल्बालाई चिन्नेजान्ने सबैका मनमा अहिले यस्तै प्रश्न नाचिरहेको छ । यो अलग कुरा हो कि कतिले सोध्छन्, कतिले सोध्दैनन् ।
ले घाँस, प्रायः कहिले पनि संसद् नजाने ओल्बाले हिजो संसद् गएर मनको बह पोख्ने नाममा सरकारसामु अनेक प्रश्न तेस्र्याएका छन् । तर कन्टिर–बाबूको चासो छ, क्यान्टोनमेन्ट भ्रष्टाचार, बालुवाटार प्रकरण र गौर हत्याकाण्ड सुल्झाउन, लिपुलेक फर्काउन र सीमा समस्या हल गर्न ओल्बा आफैँले भने कति पहल गरे ?
कन्टिर–बाबू भन्छन्– विगतमा कुबेलामा अनेक फन्डा खडा गरेर यी विषयको जिम्मेबारीबाट आफू पन्छिने र अहिले पानीमाथिको ओभानो हुने कामलाई राजनीतिक आदर्श मान्न सकिन्न । यो त भ्रामक कुरो हो र यस्ता भ्रामक कुरा कसैले पनि गर्नुहुँदैन ।
तथापि ओल्बाले समाधान गर्न समय वा ध्यान नदिएका तर अहिले आएर संसदमा रेकर्ड गराएका कुराहरू मुलुकको राष्ट्रियता र सुशासनसँग जोडिएका गम्भीर सवालहरू हुन् । आफूले काम गर्न नसकेको कुरा बिर्से पनि राज्यले ध्यान दिनैपर्ने ती काम सम्झिने–सम्झाउने ओल्बा यतिबेला धन्यवादका पात्र छन् ।
कन्टिर–बाबू भन्छन्– कुरा जसले उठाए पनि यस्ता सार्वजनिक महत्त्वको सवालमा सरकार गम्भीर हुनुपर्छ । र त्यही गम्भीरताका साथ समस्या समाधानका लागि पहल अघि बढाउनुपर्छ ।
