बडो गजबको कुरो छ यार ! सङ्घीयता र स्थानीय तहको पक्षमा कन्टिर–बाबूहरू जतिसुकै कुर्ले पनि तिनलाई सशक्त बनाइनुपर्छ भनेर जतिसुकै सङ्घर्ष गरे पनि आखिर हुने त्यही हो– जो हुनु छ ।
कन्टिर बाबु भन्छन्– के गर्नु, सङ्घीयता र स्थानीय तह सञ्चालकहरू नै खराब भएपछि कसको के लाग्छ ? दोष जति ‘सिस्टम’लाई पन्छाएर आफू ओभानो हुन त खोज्नु भएन नि !
स्थानीय तहका यस्तै एक खराब सञ्चालक भेटिएका छन्– प्रदेश २ को धनुषा जिल्लामा । प्रदेश २ त्यही प्रदेश हो, जो हम्मेसी देशमा सङ्घीयता स्थापनाको पूरा पूरा ‘जस’ लिन खोज्छ । यही प्रदेशको विदेह नगरपालिका मेयर एक अनपेक्षित क्रियाकलापमा संलग्न भएको भिडियो हालै भाइरल भएको छ । भिडियोमा मेयर साहब सोफामा खुट्टा फैलाएर बसेका छन् र एक कर्मचारी युवा उनको ‘पाउ–सेवा’ गरिरहेका छन् ।
कन्टिर–बाबूले हेरेको भिडियोमा पाउ–सेवक ती युवाको अनुहार राम्ररी चिनिन्न । तर समाचारहरूमा उल्लेख भएअनुसार ती सेवक सोही नगरपालिकामा कार्यरत कार्यालय सहयोगी हुन् ।
समाचारमै उल्लेख भएअनुसार ती सेवक मेयरका भाइ नातामा पर्छन् । कतै रोजगारी नपाएपछि मेयर साहबको कृपादृष्टि ती बेरोजगार युवामा परयो र उनले नगरपालिकामा जागिर लगाइदिए ।
ले घाँस, जागीर त गजबकोे पो रहेछ– कार्यालयमा कार्यकक्ष बन्द गरेर मेयर साहबको पाउ–पूजा गर्नुपर्ने !
अरे यार, आजको जमानामा पनि यस्तो सामन्ती पारा हुन्छ ? अस्ति जाजरकोटमा वडाध्यक्षले एक नागरिकलाई तथानाम गर्दै कुटे । अहिले फेरि धनुषाका मेयरको पाउ–सेवावाला कर्तुत बाहिरिएको छ । अनि एउटा गाउँपालिका यस्तो पनि देखियो जहाँ उपप्रमुखका ससुराको मृत्यु हुँदा शोक मनाउन गाउँपालिकामा सार्वजनिक बिदा नै दिइयो ।
हरे शिव ! के गरेको यस्तो ? फोहोर गर्नेभन्दा देख्नेलाई लाज भनेको यही हो । कन्टिर–बाबूलाई मात्र होइन, मानवअधिकारको धज्जी उडाउने यस्ता कार्य कसैलाई पनि सह्य हुँदैन ।
कन्टिर बाबू सोध्छन्– होइन, आखिर सङ्घीयता र स्थानीय तहको नाममा गाउँ–गाउँका भुरे–टाकुरेमा साँच्च्किै राजा–रानी बन्ने महत्त्वकाङ्क्षा के सारो चुलिएको हौ ? के यस्ता कार्यले सङ्घीयताको सफल कार्यान्वयनलाई सघाउँछ ?
साँच्चै, कन्टिर बाबूले थाहा नपाएरै सोधेका हुन् । कसैले अन्यथा मान्नुपर्ने कुनै कारण छैन ।
