काठमाडौ सहरमा हिजोदेखि दुई जनाको बडो चर्चा छ । कन्टिर–बाबू यी दुवै जनाको चर्चा बडो मनोयोगपूर्वक सुनिरहेका छन् । यी हुन् , कुलमान घिसिङ र गुरू भट्टराई ।
प्रधानमन्त्री देउवाले घिसिङलाई पुरानै पद अर्थात् विद्युत् प्राधिकरणको कार्यकारी निर्देशकमा बहाली गर्न ऊर्जामन्त्रीलाई निर्देशन दिएको खबर सार्वजनिक भएको छ । विगतमा लोडसेडिङ कम गर्न घिसिङले गरेको योगदानको कदर गर्दै सायद उनलाई पुनः जिम्मेवारी दिने सोच सरकारको छ ।
कन्टिर–बाबूको प्रश्न छ– यसलाई नराम्रो कसरी भन्ने ? तर केही मानिस छन्, जो यसमा पनि प्रधानमन्त्री र घिसिङको आलोचना गरिरहेका छन् । कन्टिर–बाबू बुझ्न चाहन्छन्– आखिर बिरोधको कारण के ?
अरे यार राम्रो काम गर्ने, लोकप्रिय व्यक्तिलाई पुनः जिम्मेवारी दिन नमिल्ने हो ? निर्वाचनमा दोहोर्याइ–तेहर्याइ एउटै उम्मेदवारलाई मतदाताले भोट हाल्न हुने, एउटै व्यक्ति पटक–पटक सांसद–मन्त्री बन्न हुने, एउटै व्यक्ति पाँच पटकसम्म प्रधानमन्त्री बन्न हुने, युवराजजीले गभर्नर, सल्लाहकार, योजना आयोगको सदस्य, उपाध्यक्ष, मन्त्री, राजदूत बन्न हुने अनि घिसिङजीले चाहिँ जाबो बिजुलीको कार्यकारी निर्देशकमा दोहोरिँदा आकाशै पल्टिने ?
के देशमा विद्युत् प्राधिकरण हाँक्न योग्य घिसिङमात्र छन् ? के घिसिङ निर्विकल्प व्यक्ति हुन् ? देशले लगातार एक जनामाथि निर्भर भइरहन मिल्छ ? भोलि घिसिङ नरहे देश र बिजुलीको अवस्था के होला ? कन्टिर–बाबूलाई बडो ताज्जुब लाग्छ, यस्ता कुतर्की प्रश्न सुनेर ।
कन्टिर–बाबू यस्ता कुराका पछाडि लागेर आफ्नो शक्ति क्षय गर्न चाहन्नन् । कन्टिर–बाबूको एक लाइनको स्टेटमेन्ट (भनाइ) छ– जनताले जे राम्रो मान्छन्, जेमा खुसी हुन्छन्, सरकारले ती सबै वैध काम गरिदिनुपर्छ । आखिर दुनियाँ जसदेखि राजी रहन्छन्, उसैलाई कज्याइँ दिनु भन्ने त दिव्योपदेश नै छ ।
चर्चामा रहेका अर्को व्यक्ति हुन् नेपाल रेल्बेका गुरूजी । त्रिपालले छोपेको रेल चलाउन असफल भए पनि यिनको चुरीफुरीको भने कुनै हिसाब–किताबै थिएन ।
हालै सरकारले गम्भीर आरोप लगाएर यिनलाई स्पष्टीकरण सोध्ने निर्णय गरेछ । यसको अर्थ हो– अब चाँडै नै यिनको पत्ता–साफ हुनेवाला छ र एउटा गम्भीर प्रकृतिको व्यक्ति नेपाल रेल्बेको नेतृत्वमा आउनेछ । कन्टिर–बाबूलाई लाग्छ, यो पनि जनताले नै चाहेको निर्णय हो ।
